Don Antonio Coluccia, një prift italian antimafia që ka luftuar për vite me krimin dhe trafikun e drogës në Romë, është sulmuar në një “sulm të dhunshëm mafioz” në kryeqytetin italian.
Don Coluccia, 49 vjeç, i cili jeton nën mbrojtje të rreptë për shkak të kërcënimeve të shumta nga organizatat kriminale, u sulmua të dielën mbrëma me dërrasa, shishe dhe shkopinj në distriktin Quarticciolo, ku po udhëhiqte një marshim kundër krimit.
Gjatë sulmit, një person thuhet se bërtiti nga një dritare: “Koha jote po mbaron – ne do të të vrasim,” ndërsa sulmi ndodhte në rrugën poshtë, përcjell The Guardian.
Prifti, i cili është në shënjestër të një grupi mafioz romak për shkak të qëndrimeve të tij dhe për faktin që ka kthyer një shtëpi të konfiskuar të një bosi mafioz në një strehë për të varfrit dhe të varurit nga droga, u shpëtua shpejt nga oficerët e sigurimit të tij.
Pas sulmit, Don Coluccia tha për Roma Today: “Do të kthehem. Jam i përkushtuar t’i shërbej qytetit. Do të përpiqem gjithmonë për drejtësi për qytetarët e ndershëm të këtij lagje. Të dielën u ndala të flisja me disa të rinj, pastaj ndodhi ajo që ndodhi. Situata këtu është e rëndë.”
Kjo nuk është hera e parë që Don Coluccia përballet me sulme apo kërcënime nga grupet kriminale. Në vitin 2014, shtëpia dhe makina e tij u vandalizuan.
Në qershor të vitit 2015, dy burra qëlluan drejt tij, por fatmirësisht humbën objektivin dhe plagosën lehtë një kalimtar. Në gusht të vitit 2023, një person u përpoq ta godiste me skuter në Tor Bella Monaca, një lagje e varfër në periferi të Romës. Sulmuesi më vonë u arrestua për tentativë vrasjeje.
Priftërinj të tjerë në Itali gjithashtu janë sulmuar dhe kërcënuar nga mafia, duke përfshirë edhe At Maurizio Patriciello dhe At Luigi Ciotti, të cilët jetojnë nën mbrojtje policore për shkak të luftës së tyre kundër krimit të organizuar.
Sulmi ndaj Don Coluccia është një tjetër shembull i guximit të atyre që kundërshtojnë mafian në Itali, pavarësisht rrezikut të vazhdueshëm për jetën e tyre.
