Policia gjermane në Mynih tha se oficerët qëlluan ndaj një personi të dyshimtë të enjten në një zonë pranë Konsullatës izraelite dhe një muzeu kushtuar historisë së qytetit të epokës naziste.
Sipas një deklarate në rrjetin social X, personi është goditur nga të shtënat me armë zjarri, por nuk jepen detaje të tjera. Deklarata tha gjithashtu se nuk kishte prova për të dyshuar të tjerë të lidhur me incidentin, raporton Euronews.
Motivi i sjelljes së dyshimtë të individit nuk është bërë i ditur menjëherë.
Ngjarja ka ndodhur në zonën Karolinenplatz, pranë qendrës së qytetit të Mynihut. Policia tha se kishte rritur praninë e tyre në qytet, qyteti i tretë më i madh i Gjermanisë, por nuk kishte asnjë indikacion për incidente në ndonjë vendndodhje tjetër apo ndonjë të dyshuar tjetër.
Ngjarja ka ndodhur në 52-vjetorin e “Masakrës së Mynihut” kryer nga tetë anëtarë të organizatës militante palestineze “Shtatori i Zi”. Militantët depërtuan në fshatin Olimpik, vranë dy anëtarë të ekipit olimpik izraelit dhe morën peng nëntë të tjerë, të cilët më vonë u vranë në një përpjekje të dështuar shpëtimi.
Ministria e Jashtme e Izraelit tha se konsullata në Mynih ishte e mbyllur kur ndodhën të shtënat dhe se asnjë personel i konsullatës nuk ishte prekur nga incidenti.
