Izraeli ka nisur sulme ajrore në Bejrut pasi kryeministri Benjamin Netanyahu urdhëroi Forcat e Mbrojtjes të Izraelit (IDF) të vazhdojnë luftimet me intensitet të plotë në Liban. Deklarata e tij erdhi pasi Shtetet e Bashkuara, Mbretëria e Bashkuar dhe aleatë të tjerë bënë thirrje për një armëpushim 21-ditor midis Izraelit dhe Hezbollahut.
Më herët, ushtria izraelite njoftoi se kishte goditur rreth 75 objektiva të Hezbollahut në jug të Libanit dhe në rajonin e Bekaa-s gjatë natës., sipas BBC.
Ministria e Shëndetësisë e Libanit raportoi se të paktën 13 persona u vranë në sulmet e fundit, ndërsa numri i të vrarëve që nga e hëna ka kaluar 550.
Që nga 8 tetori, ka pasur pothuajse çdo ditë përplasje të armatosura në kufirin midis Izraelit dhe Hezbollahut.
Hezbollahu, i mbështetur nga Irani, deklaroi se po vepron në solidaritet me palestinezët, ndërsa Izraeli synon të eliminojë kërcënimin e Hezbollahut dhe të kthejë njerëzit e zhvendosur në veri të Izraelit.
