Kombet e Bashkuara duhet të përdorin autoritetin e tyre për të thirrur përdorimin e forcës së armatosur për të ndaluar luftën e Izraelit në Gaza, tha të hënën presidenti turk Rexhep Tajip Erdogan. Ai kritikoi ashpër operacionin izraelit në enklavën palestineze dhe sulmet ajrore në Liban.
Pothuajse një milion civilë libanezë u zhvendosën për shkak të sulmeve izraelite, tha Erdogan pas një takimi të kabinetit në Ankara.
Të paktën 1,300 njerëz u vranë në pak më shumë se një javë, sipas autoriteteve libaneze.
“Të ngrihesh për Palestinën dhe Libanin do të thotë të ngrihesh për njerëzimin, për paqen, për kulturën e bashkëjetesës së besimeve të ndryshme”, tha kreu turk.
Në rastin e Gazës, autoriteti i Asamblesë së Përgjithshme të OKB-së për të rekomanduar përdorimin e forcës, si në rezolutën e vitit 1950 “Bashkimi për Paqe”, duhet të përdoret me shpejtësi.
Rezoluta e vitit 1950 thotë se, nëse Këshilli i Sigurimit i OKB-së nuk arrin të ruajë paqen ndërkombëtare, organizata mund të rekomandojë masa kolektive deri në përdorimin e forcës së armatosur.
Erdogan akuzoi “një grusht ekstremistësh radikalë sionistë” se i vunë zjarrin “rajonit dhe gjithë botës”. Bashkësia ndërkombëtare dhe bota islame duhet “të ndërmarrin veprime për paqen e të gjithëve në rajonin tonë, muslimanëve, hebrenjve dhe të krishterëve njësoj,” kërkoi ai.
Turqia ndërpreu tregtinë me Izraelin në fillim të këtij viti, duke premtuar se do të vazhdojë bojkotin derisa fluksi i ndihmave humanitare në Gazën e rrethuar të rivendoset plotësisht. Përveç kësaj, Ankaraja iu bashkua çështjes në vazhdim të Afrikës së Jugut kundër Izraelit në Gjykatën Ndërkombëtare të Drejtësisë, e cila pretendonte se shteti hebre po kryente gjenocid kundër palestinezëve në Gaza.
