Një ekip futbolli i përbërë tërësisht nga burra transgjinorë ka filluar të luajë në një ligë rajonale në Spanjë, ka raportuar Reuters.
Skuadra, e quajtur Fenix FC, ka konkurruar zyrtarisht në divizionin e pestë të meshkujve në rajonin spanjoll të Katalonjës pasi u inkorporua në një klub lokal në periferi të Barcelonës, Sant Feliu de Llobregat. Kjo e bën skuadrën katalanase skuadrën e parë të të gjithë transëve që i bashkohet një federate futbolli në Evropë.
Fenix FC – i quajtur sipas feniksit mitik – luajti ndeshjen e parë në ligë më 21 shtator dhe humbi 19-0.
Themeluesi i Fenix FC, Hugo Martinez, i tha Reuters se ai vendosi të krijojë një skuadër të të gjithë transëve pasi iu kërkua të largohej nga ekipi i femrave pasi ai nisi të të kthehej në burrë përmes terapisë hormonale.
Kapiteni i ekipit, Luke Ibanez, tha se ai iu bashkua klubit sepse kishte frikë se nuk do pranohej dhe madje mund të dhunohej në një ekip meshkujsh.
“Fenix është një ekip djemsh trans i krijuar tërësisht nga djem trans, por unë mendoj se është më shumë se kaq, është një familje, një hapësirë e sigurt ku mund të jesh i lirë dhe të shprehesh si të duash dhe si ndihesh vërtet”, shtoi Ibanez.
Në fund të vitit 2022, Spanja miratoi legjislacionin që lejon qytetarët të ndryshojnë gjininë e tyre ligjore pa pasur nevojë për vlerësim psikologjik ose ndonjë vlerësim tjetër mjekësor.
Federata Katalane e Futbollit i tha Reuters se ligat e saj për meshkuj kanë qenë të përziera për dy sezonet e fundit, me njerëz të çdo gjinie në gjendje të marrin pjesë. Lojtarët gjithashtu mund të konkurrojnë me një emër që ndryshon nga emri i tyre ligjor, shtoi ai.
