Mbreti Charles ka deklaruar se nuk do të ndërhyjë nëse Australia dëshiron të zëvendësojë atë si kreun e saj të shtetit.
Gjatë përgatitjeve për vizitën e tij në Australi këtë muaj, raportohet se mbreti po adopton një qasje “anti-konfrontuese” ndaj kampionëve republikanë të vendit.
Sipas “Daily Mail”, përfaqësuesit e Lëvizjes Republikane të Australisë (ARM) kanë kërkuar një takim me monarkun, përcjell The Guardian.
Ndihmësi i sekretares private të mbretit, Nathan Ross, ka theksuar dashurinë dhe afeksionin e thellë të Charles për Australinë, duke shtuar se “si monark kushtetues, madhëria e tij vepron mbi këshillat e ministrave të tij dhe çështja nëse Australia bëhet republikë është një vendim për popullin australian.”
ARM është organizata që përfaqëson interesat e atyre që dëshirojnë një republikë me një australian si kreun e shtetit. Në vitin 1999, Australia mbajti një referendum për çështjen e republikës, ku 54.9% votuan kundër.
Kryeministri Anthony Albanese ka shprehur më parë se “Australia duhet të ketë një australian si kreun e saj të shtetit”, por së fundmi ka nënvizuar se një referendum i dytë nuk është prioritet.
Një zëdhënës i Pallatit Buckingham tha: “Ashtu si nëna e tij para tij, mbreti gjithmonë ka ndjerë se kjo është një çështje për popullin australian.”
Graham Smith, kreu i grupit britanik anti-monarki, i cili ndodhet në Australi për të protestuar gjatë vizitës së mbretit, tha se përgjigjja kryesore ndaj këtij udhëtimi ka qenë “mosinteresimi dhe indiferenca.”
Ai shtoi: “Shumica e njerëzve janë fare të pavetëdijshëm për vizitën dhe nuk i intereson.”
Vizita e mbretit do të jetë turneu më i rëndësishëm jashtë vendit që nga diagnostikimi i tij me kancer dhe e para në Australi si kreu i shtetit.
