Eksploruesi i shekullit të 15-të Christopher Columbus ishte një hebre sefardik nga Evropa Perëndimore, thanë shkencëtarët spanjollë të shtunën, pasi përdorën analizën e ADN-së për të trajtuar një mister shekullor.
Disa vende kanë debatuar mbi origjinën dhe vendin përfundimtar të varrosjes së figurës polemizuese që udhëhoqi ekspeditat e financuara nga Spanja nga vitet 1490 e tutje, duke hapur rrugën për pushtimin evropian të Amerikës.
Shumë historianë kanë vënë në dyshim teorinë tradicionale se Kolombi erdhi nga Xhenova, Itali. Teori të tjera shkojnë nga të qenit hebre spanjoll apo grek, te baskët, portugezët apo britanikët.
Për të zgjidhur misterin, studiuesit kryen një hetim 22-vjeçar, të udhëhequr nga eksperti mjeko-ligjor Miguel Lorente, duke testuar mostra të vogla të mbetjeve të varrosura në Katedralen e Seviljes, e shënuar prej kohësh nga autoritetet atje si vendi i varrosjes së Kolombit, pavarësisht pretendimeve bfa vende të tjera.
Ata i krahasuan me ato të të afërmve dhe pasardhësve të njohur dhe gjetjet e tyre u njoftuan në një dokumentar të titulluar “Columbus ADN: Origjina e vërtetë” në median kombëtare të Spanjës TVE të shtunën.
“Ne kemi ADN nga Christopher Columbus, shumë e pjesshme, por e mjaftueshme. Kemi ADN nga Hernando Colón, djali i tij,” tha Lorente në program.
Rreth 300,000 hebrenj jetuan në Spanjë përpara se “Reyes Catolicos”, monarkët katolikë Isabella dhe Ferdinand, të urdhëronin hebrenjtë dhe muslimanët të konvertoheshin në besimin katolik ose të largoheshin nga vendi. Shumë u vendosën nëpër botë. Fjala Sefardic vjen nga Sefarad, ose Spanja në Hebraisht.
Pas analizimit të 25 vendeve të mundshme, Lorente tha se ishte e mundur vetëm të thuhet se Kolombi ka lindur në Evropën Perëndimore.
Të enjten, Lorente tha se ata kishin konfirmuar teoritë e mëparshme se mbetjet në Katedralen e Seviljes i përkisnin Kolombit.
Hulumtimi mbi kombësinë e Kolombit u ndërlikua nga një sërë faktorësh duke përfshirë sasinë e madhe të të dhënave. Por “rezultati është pothuajse absolutisht i besueshëm,” tha Lorente.
Kolombi vdiq në Valladolid, Spanjë, në 1506, por dëshironte të varrosej në ishullin e Hispaniola që sot ndahet nga Republika Domenikane dhe Haiti. Eshtrat e tij u morën atje në 1542, më pas u transferuan në Kubë në 1795 dhe më pas në Spanjë, në Sevilje në 1898.
