Kryetarja e Kuvendit, Elisa Spiropali, përshëndeti çeljen e grup-kapitullit të parë të negociatave Shqipëri-BE gjatë seancës së sotme plenare.
Ajo theksoi rëndësinë e konferencës së dytë ndërqeveritare të mbajtur në Luksemburg më 15 tetor, e cila simbolizon një hap të madh përpara drejt realizimit të ëndrrës për integrim në Evropë.
Spiropali e cilësoi këtë moment si historik dhe një gur themeli në rrugëtimin e Shqipërisë drejt ribashkimit me Evropën, duke theksuar se vendi ynë ka vetëm një plan: anëtarësimin në Bashkimin Evropian. Ajo ftoi opozitën që pavarësisht bindjeve të tyre politike të bëhen sëbashku në realizimin e ëndrrës së shqiptarëve.
Ajo përfundoi duke e cilësuar Europën si ëndrrën dhe destinacionin e përbashkët të të gjithëve.
“Siç tashmë e dimë, në datën 15 tetor, në Luksemburg, u mbajt Konfereca e Dytë Ndërqeveritare BE-Shqipëri, për çeljen e negociatave për Grup-Kapitujt “Themelorët”.
Ky është moment historik, hap i madh përpara drejt realizimit të ëndrrës rilindase naimiane se për ne, shqiptarët, dielli lind nga perëndon.
Është një gur themeli në rrugëtimin tonë drejt ribashkimit me Europën, të cilës i përkasim genetikisht, gjeografikisht, historikisht, kulturalisht, me rrënjë, me frymë, me perspektivë e vizion.
15 tetori kurorëzoi përpjekjet e mëdha të deritanishme të Shqipërisë drejt Europës, arritjet tona të dukshme dhe të padiskutueshme në progresin e reformave demokratizuese dhe integruese, të mirëqeverisjes, sundimit të ligjit, luftës kundër krimit, korrupsionit dhe pandëshkueshmërisë.
Ne kemi dëshmuar me vepra, me reforma, se kemi vetëm një plan A drejt të ardhmes sonë, drejt Bashkimit Europian.
Ne jemi të vetëdijshëm se vetëm kështu përmbushim aspiratën e të gjithë shqiptarëve, të cilët si asnjë popull tjetër në Ballkanin Perëndimor, na mbështesin, nxisin e frymëzojnë në udhën drejt familjes europiane.
Grup-kapitujt “Themeloret”, për të cilat u çelën negociatat, përfshijnë çështjet e mëposhtëme:
Funksionimi i institucioneve demokratike
Reforma në administratën publike.
Gjyqësori dhe të drejtat themelore.
Drejtësia, liria dhe siguria.
Kriteret ekonomike.
Prokurimi publik.
Statistikat.
Kontrolli financiar.
Nga sot punët tona shtohen, përgjegjësitë tona rriten, detyrat tona shumëfishohen.
Jam e bindur se shpreh edhe mendimin tuaj se të gjithë ne, do të vijojmë të jemi të angazhuar për përmbushjen e misionit të Kuvendit si udhëheqës i procesit të integrimit europian, si garantues i legjitimitetit demokratik dhe karakterit gjithëpërfshirës të procesit.
Duke vlerësuar kontributin e deritanishëm të Këshillit Kombëtar të Integrimit Europian, Komisionit për Çështjet Europiane, të komisioneve të përhershme, të komisioneve të posaçme dhe të të gjithëve ju, kolege e kolegë të nderuar, dëshiroj t’ju siguroj për mbështetjen time të pakursyer dhe angazhimin maksimal, drejt përmbushjes së këtij prioririteti strategjik kombëtar, i cili është njëkohësisht prioriteti numër një i Kuvendit të Shqipërisë.
Pavarësisht partive apo ideologjive, Europa është ëndrra dhe destinacioni ynë i përbashkët.
Prandaj, në këto ditë të shënuara për të gjithë ne, gjej rastin t’u bëj thirrje kolegëve opozitarë, që duke i respektuar bindjet e tyre politike, orientimin dhe vlerat perëndimore, në respekt të Kushtetutës dhe ligjit, si dhe në emër të Shqipërisë europiane, të bëhemi të gjithë bashkë për përshpejtimin e realizimit të ëndrrës së shqiptarëve, Bashkimit Europian, këtij realiteti ndër më të bukurit dhe më të dobishmit e njerëzimit dhe qytetërimit bashkëkohor“, u shpreh Spiropali.
