SHBA-ja ka nisur një hetim pasi raportet e inteligjencës shumë të klasifikuara në lidhje me përgatitjet e Izraelit për sulme të mundshme ndaj Iranit u zbuluan në internet, raportoi CNN të shtunën, duke cituar tre persona të njohur me këtë çështje.
Shkelja e dukshme e sigurisë ndodhi mes një përplasjeje intensive midis Iranit dhe Izraelit, i cili është zotuar se do t’i përgjigjet një breshërie raketash të lëshuara nga Teherani në fillim të këtij muaji.
Të premten, dy dokumente u postuan në kanalin anonim Telegram Middle East Spectator, i cili mbulon ngjarjet në rajon dhe është kritik ndaj Izraelit.
E pari nga dosjet, me sa duket e përgatitur nga Agjencia Kombëtare e Inteligjencës Gjeohapësinore e Pentagonit, thotë se Forcat e Mbrojtjes të Izraelit (IDF) “vijuan përgatitjet kryesore të municioneve dhe veprimtarinë e fshehtë të droneve më 16 tetor, pothuajse me siguri për një sulm ndaj Iranit”.
Dokumenti i dytë përmban një raport të hollësishëm në lidhje me një “stërvitje me forcë të madhe” të kryer nga Forcat Ajrore izraelite në 15-16 tetor.
Një zyrtar amerikan i paidentifikuar konfirmoi autenticitetin e dokumenteve për CNN, duke e përshkruar rrjedhjen si “thellësisht shqetësuese”. Zyrtari i tha rrjetit se hetimi në vijim synon të përcaktojë se kush kishte qasje në dosjet tepër sekrete që përfundimisht shkaun në mediat sociale.
Kanali Telegram që publikoi dokumentet lëshoi një deklaratë të shtunën, duke pretenduar se kishte marrë dosjet nga “një burim anonim në Telegram, i cili kundërshtoi të identifikohej”. Kanali më tej pretendoi se nuk kishte “asnjë lidhje me zbuluesin origjinal”.
Më 1 tetor, Irani gjuajti rreth 200 raketa balistike ndaj Izraelit në përgjigje të luftës në Gaza dhe vrasjeve të anëtarëve kryesorë të grupeve militante pro-palestineze Hamas dhe Hezbollah. Sipas IDF-së, shumica e raketave u kapën. E vetmja viktimë e drejtpërdrejtë nga sulmi ishte një palestinez nga Bregu Perëndimor, i cili u vra nga një copëz rakete që ra.
