Të paktën 47 palestinezë u vranë dhe dhjetëra të tjerë u plagosën sot në sulmet ajrore izraelite në zonat qendrore të Rripit të Gazës, Deir al-Balah, Nuseirat dhe Zawayda, sipas agjencisë zyrtare palestineze të lajmeve, transmeton Anadolu.
Sulmet kishin në shënjestër disa lagje gjatë natës dhe deri në orët e mëngjesit, duke goditur zona të banuara dhe shtëpi të shumta familjare, raportoi agjencia WAFA.
Zyrtarët mjekësorë në Spitalin e Martirëve Al-Aksa në Deir al-Balah konfirmuan mbërritjen e 47 trupave dhe të plagosurve të shumtë, shumë në gjendje kritike.
Dëshmitarët raportojnë se disa familje nga pjesë të tjera të Gazës ishin mbledhur me të afërmit në Nuseirat dhe se një bombardim fillestar u pasua nga një goditje e dytë, duke kapur banorët dhe kalimtarët që nxituan për të ndihmuar.
Kërkimet vazhdojnë për njerëzit që ende janë të zhdukur nën rrënoja, shtojnë ata.
Ushtria izraelite ka vazhduar ofensivën shkatërruese në Rripin e Gazës që nga tetori i vitit të kaluar, pavarësisht nga një rezolutë e Këshillit të Sigurimit të OKB-së që kërkon armëpushim të menjëhershëm.
Më shumë se 43.160 njerëz janë vrarë që atëherë, kryesisht gra dhe fëmijë, dhe mbi 101.500 të tjerë janë plagosur, sipas autoriteteve lokale shëndetësore.
Sulmet izraelite kanë zhvendosur pothuajse gjithë popullsinë e territorit, krahas një bllokade të vazhdueshme që ka çuar në mungesa të mëdha të ushqimit, ujit të pastër dhe ilaçeve.
Izraeli gjithashtu përballet me akuza për gjenocid në Gjykatën Ndërkombëtare të Drejtësisë për luftën e tij brutale ndaj Gazës.
