Njëzet e nëntë fëmijë mund të përballen me dënimin me vdekje në Nigeri pasi u dënuan të premten për pjesëmarrje në protestën kundër krizës tejet të lartë të kostos së jetesës në vend. Gjithsej 76 protestues u akuzuan për 10 akuza, duke përfshirë tradhti, shkatërrim të pronës, trazira publike dhe kryengritje.
Sipas fletës së akuzës, të miturit ishin të moshave nga 14 deri në 17 vjeç.
Frustrimi për krizën e kostos së jetesës ka çuar në disa protesta të mëdha muajt e fundit. Në gusht, të paktën 20 njerëz u qëlluan për vdekje dhe qindra të tjerë u arrestuan në një protestë të madhe.
Dënimi me vdekje u prezantua në vitet 1970 në Nigeri, por nuk ka pasur ekzekutime në vend që nga viti 2016.
Akintayo Balogun, një avokat privat me bazë në Abuja, tha se Akti i të Drejtave të Fëmijëve nuk lejon që asnjë fëmijë t’i nënshtrohet procedimeve penale dhe të dënohet me vdekje.
“Çuaarja e të miturve para një gjykate të lartë federale është e gabuar, ab initio, përveç nëse qeveria është në gjendje të provojë se djemtë janë të gjithë mbi 19 vjeç,” tha Balogun.
Popullsia e Nigerisë prej mbi 210 milionë banorësh, më e madhja e kontinentit, është gjithashtu ndër më të uriturat në botë dhe qeveria e saj ka luftuar për të krijuar vende pune. Norma e inflacionit është gjithashtu në nivelin më të lartë të 28 viteve dhe monedha vendase naira në nivele rekord të ulëta kundrejt dollarit.
