Sot është inauguruar Ura e Madhe në Kukës, një projekt që pritet të ndryshojë rrjedhën e qarkullimit në zonë. Kryeministri Edi Rama ishte i pranishëm në këtë ngjarje, ku u prit me këngë dhe valle nga qytetarët.
Ura e Madhe, e ndërtuar mbi lumin Drin, ka një gjatësi totale prej 310 metrash, me një hark metalik që shtrihet 270 metra dhe një lartësi prej 56 metrash. Ajo do të ofrojë 4 korsi, duke lehtësuar ndjeshëm trafikun dhe duke eliminuar ngërçin që ka prekur këtë zonë për vite me radhë.
Rama theksoi rëndësinë e kësaj vepre për zhvillimin e Kukësit, duke përmendur se inaugurimi i urës është një përgjigje për ata që kanë shpërndarë dezinformata në rrjetet sociale.
“HAPET URA E MADHE e Kukësit, një vepër mbresëlënëse, e cila çliron përfundimisht qarkullimin e ngërçosur prej vitesh dhe i jep një përgjigje kuptimplotë të gjitha qyqeve që mbushën rrjetet sociale me vrer lajmesh të rreme, ndërkohë që po siguroheshin edhe akseset e komuniteteve përreth”, shkruan Rama.
