Ministria e Bujqësisë ka bërë të ditur se deri më tani nuk ka asnjë rast të regjistruar të personave të prekur nga gripi i shpendëve H5N1. Kjo deklaratë vjen pas identifikimit të një vatre me gripin e shpendëve në fshatin Mëzez në Tiranë, ku ISHP ka analizuar 90 mostra, të gjitha rezultuan negative.
Gjatë fundjavës, në periudhën 30 tetor – 3 nëntor 2024, grupet e monitorimit kanë kontrolluar 2304 ferma, ku mbarështohen 96,900 shpendë.
Pas shpalljes së alarmit për gripin e shpendëve, janë marrë masa të menjëhershme për të parandaluar përhapjen e virusit, përfshirë ndalimin e lëvizjes së shpendëve nga fermat e Bashkive Tiranë, Vorë dhe Kamëz.
Ministria ka siguruar se situata është nën monitorim të vazhdueshëm, dhe shërbimi veterinar është angazhuar për të zbuluar dhe kufizuar çdo përhapje të mundshme të virusit.
Të gjitha kampionet e marra nga njerëzit gjithashtu kanë rezultuar negative, dhe Ministria po bashkëpunon me Institutin e Shëndetit Publik për një survejancë të përforcuar.
Njoftimi i plotë i Ministrisë së Bujqësisë
Në kuadër të transparencës publike ju bëjmë me dije se situata e gripit të shpendëve është nën monitorim dhe kontroll, nga zinxhiri institucional i Ministrisë së Bujqësisë dhe Zhvillimit Rural, për zbulimin dhe kufizimin e hershëm të përhapjes së virusit H5N1.
Përgjatë fundjavës, në datat 30 Tetor – 3 Nëntor 2024, grupe ditore me përbërje të 7 veterinerëve zyrtarë të shërbimit dhe kontrollit, janë angazhuar në terren, sipas përcaktimeve të perimetrit të zonës së mbrojtjes dhe mbikëqyrjes për: inventarizimin dhe monitorimin klinik të 2304 fermave, në të cilat mbarështohen 96 900 shpendë të kategorive dhe llojeve të ndryshme.
Në kuadër të monitorimit të Influencës Aviare, menjëherë mbas shpalljes “alert” nga Laboratori i Referencës – ISUV, Shërbimi Veterinar Zyrtar në zbatim të Urdhrit të Ministrit të Bujqësisë dhe Zhvillimit Rural Nr. 885, datë 30.10.2024 “Për marrjen e masave kufizuese për parandalimin dhe kontrollin e sëmundjes së influencës aviare në shpendë, në mjediset e hapura dhe në tregjet e kafshëve të gjalla” filloi monitorimin e fermave brenda zonës se mbrojtur në Njësinë Administrative Mëzez, Kashar, Tiranë, dhe bazuar në Planin e Kontingjencës sipas Urdhrit të Ministrit Nr. 411 datë 20.09.2022 “Për miratimin e planit të kontigjencës për sëmundjen e Influencës Aviare” ka kontrolluar lëvizjen e shpendëve të gjallë, në zonën e konfirmuar pozitive, në të cilën janë marrë kampione nga Autoriteti Kombëtar i Veterinarisë dhe Mbrojtjes së Bimëve, për ti analizuar ato në Institutin e Sigurisë Ushqimore dhe Veterinarisë.
Nga data 30 Tetor deri në 3 Nëntor 2024, në ISUV kanë mbërritur dhe janë analizuar 90 mostra zyrtare, të cilët janë testuar me metodën e akredituar dhe të avancuar molekulare RT-PCR. Laboratori i Referencës – ISUV, është përgjegjës për testimin e kampioneve lidhur me Influencën Aviare, ka marrë të gjitha masat për t’iu përgjigjur situatës emergjente, duke ofruar kapacitet laboratorik dhe teknik për analizimin e çdo kampioni të ardhur brenda 24 – 48 orëve, me qëllim përgjigjen e shpejtë të strukturave përgjegjëse në zbatimin e masave, lidhur me izolimin e rastit dhe parandalimin e përhapjes se infeksionit.
Kampionet në njerëz të marra janë testuar nga Instituti i Shëndetit Publik, dhe kanë rezultuar negative. Ministria e Bujqësisë dhe Zhvillimit Rural po bashkëpunon ngushtë me Institutin e Shëndetit Publik, i cili po kryen një survejancë të përforcuar për infeksionet respiratore në zonën e fermës së prekur nga sëmundja, përkatësisht, për zbulimin në kohë dhe marrjen e masave kundër virusit H5N1.
Masat kufizuese dhe parandaluese do të jenë në fuqi deri në përfundimin e afatit të karantinës, si dhe Qëndrat Kombëtare dhe Rajonale të Krizës do të vazhdojnë koordinimin dhe funksionin e tyre deri në mbylljen e rasteve, pa rekurenca. Për cdo informacion dhe lajmërim, ftojmë qytetarët dhe shpendërritësit të kontaktojnë Autoritetin Kombëtar të Veterinarisë dhe Mbrojtjes së Bimëve, në numrin e gjelbër 08003366, ose në adresën e e-mailit: info@akvmb.gov.al
