Koalicioni qeverisës gjerman është shembur.
Sipas raporteve të shumta mediatike, Kancelari Olaf Scholz i Social Demokratëve (SPD) ka shkarkuar Ministrin e Financave Christian Lindner nga Partia Liberale Demokratike (FDP), përcjel Euronews.
Udhëheqësit e koalicionit të ashtuquajtur “semafori” – SPD, FDP dhe Të Gjelbrit – janë mbledhur në kancelarinë në Berlin këtë mbrëmje.
Thuhet se Lindner i ka propozuar Scholzit mbajtjen e zgjedhjeve të parakohshme në fillim të vitit 2025, për të adresuar krizën politike të krijuar.
Raportohet se Scholz pritet të dalë së shpejti përpara mediave për të dhënë një deklaratë mbi situatën e krijuar.
Shqetësimet e Scholz dhe mungesa e një qasjeje të unifikuar
Kancelari Scholz i bëri thirrje partnerëve të koalicionit të prioritizojnë interesin e vendit përpara bindjeve partiake.
“Kjo çështje nuk është për ideologji, por për ndjenjën e përkushtimit ndaj vendit,” tha Scholz të martën në Berlin, duke shtuar se zgjidhja është e mundshme nëse të gjithë janë të përkushtuar.
Demokratët e Lirë janë shprehur kategorikisht kundër rritjes së taksave ose ndryshimeve në kufizimet e borxhit dhe kanë kërkuar kursime në fusha si përfitimet për të papunët afatgjatë.
Javën e kaluar, Lindner paraqiti një dokument prej 18 faqesh me propozime për ndryshime në politikat ekonomike, i cili u publikua në media, duke përforcuar pozicionin e tij kundër shpenzimeve të larta qeveritare.
Nga ana tjetër, politikanët e krahut të majtë kërkojnë investime të mëdha nga shteti dhe refuzojnë çdo përpjekje për të reduktuar programet e mirëqenies.
Ekonomia në rënie dhe problemet e brendshme
Ekonomia gjermane pritet të tkurret për të dytin vit radhazi në 2024, e goditur si nga faktorët e jashtëm ashtu edhe nga problemet e brendshme, si burokracia dhe mungesa e fuqisë punëtore të kualifikuar.
