Presidenti Joe Biden ka telefonuar ish-presidentin Donald Trump për ta uruar për fitoren në zgjedhjet presidenciale, duke shprehur angazhimin e tij për të siguruar një tranzicion të qetë të pushtetit, njoftoi Shtëpia e Bardhë.
Sipas një deklarate të Shtëpisë së Bardhë, Biden theksoi rëndësinë e bashkimit të vendit dhe e ftoi Trumpin të takohej me të në Shtëpinë e Bardhë për të diskutuar një kalim të qetë të administratës. Zëdhënësi i fushatës së Trump, Steven Cheung, konfirmoi ftesën, duke shtuar se Trump e ka vlerësuar shumë thirrjen dhe pret me padurim takimin e planifikuar së shpejti.
Në të njëjtën ditë, Biden gjithashtu ka biseduar me nënpresidenten Kamala Harris, duke e uruar atë për “fushatën e saj historike”. Pas fjalimit të koncesionit të Harris ndaj kombit, Biden e ka lavdëruar atë për guximin dhe karakterin e saj. Ai e ka cilësuar zgjedhjen e Harris si kandidate si “vendimin më të mirë” që ai ka marrë, duke theksuar se historia e saj përfaqëson më të mirën e Amerikës dhe se ajo do të vazhdojë të shkruajë këtë histori për të ardhmen e vendit.
Sipas Biden, Harris është një “lider që fëmijët tanë dhe brezat që do të vijnë do ta shohin si një kampione për të gjithë amerikanët”.
Po ashtu, Trump dhe Harris kanë biseduar edhe ata në telefon, ku Harris i ka thënë Trumpit se do të bashkëpunojë me Biden për të siguruar një kalim paqësor të pushtetit, duke theksuar se ky proces do të jetë më i qetë dhe më i rregullt në krahasim me tranzicionin e vitit 2020./ABCNEWS
