Partia Demokratike ka kërkuar hetim pasuror dhe dorëheqjen e Ministrit të Drejtësisë, Ulsi Manja, pas zbulimeve për blerjen e një toke 1000 m² buzë liqenit të Farkës dhe aplikimin për ndërtimin e një kompleksi vilash.
PD e akuzon ministrin për konflikt interesi, shmangie të çmimeve të tregut dhe mosdeklarim të pasurisë në kohën reale. Sipas PD, SPAK duhet të nisë urgjentisht hetimet për këtë çështje.
Deklarata e zëdhënëse së antikorrupsionit në PD, Genta Vangjeli,
Ish ndihmës-gjyqtari, ish prokurori dhe avokati, deputeti socialist njëherazi anëtari i komisionit të posaçëm të reformës në drejtësi dhe kryetari i Komisionit të Ligjeve, aktualisht Ministri i Drejtësisë Ulsi Manja në formularin e deklarimit të pasurisë dorëzuar në 31 Mars 2024 ka shënuar blerjen e një pasurie të paluajtshme tokë me sipërfaqe 1000 m2, me një vlerë të pacaktuar, dhe pa deklaruar kohën e blerjes e as burimin e krijimit të të ardhurave.
Ndërkohë mediat shkruajnë, ( https://lapsi.al/2024/11/11/ulsi-manja-i-futet-biznesit-te-ndertimit-ministri-me-kompleks-vilash-ne-farke/) se pasi investoi 3 milionë lekë për blerjen e një sipërfaqeje toke buzë liqenit të Farkës, ministri i Drejtësisë, Ulsi Manja synon që ta transformojë atë në një pasuri me vlerë qindra-mijëra euro brenda një kompleksi vilash me pishina dhe mure rrethuese buzë liqenit të Farkës nën dyshimet për anashkalimin e çmimeve të tregut dhe konfliktin e interesit.
Manja e bleu tokën në vitin 2021 nga zyrtari i Erjon Veliajt, Arben Maloku i ndërtimeve pa leje dhe 5D-së, i cili mbante në atë kohë detyrën e administratorit të njësisë vendore të Zall Herrit, pjesë e Bashkisë së Tiranës.
Tre vjet pas blerjes së tokës të cilën e ka deklaruar në ILDKPI vetëm në 2024 dhe jo në kohën reale të blerjes, sipas po të njëjtit burim, Manja dhe bashkëshortja e tij aplikuan për leje ndërtimi në Bashkinë e Tiranës për projektin e një kompleksi vilash, së bashku me pronarë të tjerë të tokave fqinje në Farkë.
Detajet e marrëveshjes mes pronarëve të tokës janë të panjohura dhe nuk rezultojnë të jenë deklaruar nga ministri Manja në ILDKPKI në vitin 2023.
Sipas të njëjtit burim, Bashkia e Tiranës ka konfirmuar aplikimin për leje ndërtimi kryer më 26 prill, kërkesa është protokolluar në bashki më 10 qershor të këtij viti, dhe ndodhet aktualisht në fazën e shqyrtimit administrativ.
Partia Demokratike ka denoncuar më parë Ulsi Manjën (Ulsi Manja blen 1 mijë metra tokë në Farkë”/ Çlirim Gjata denoncon aferën e ministrit) për këtë blerje toke poshtë çmimit të referencës, duke shmangur taksat …
Por ILDKPI a ka kryer një hetim administrativ për pasurinë e ministrit Ulsi Manja ?!
Imagjinoni çfarë duhet të presin shqiptarët nga ky Ministër që drejton drejtorinë e përgjithshme antikorrupsion që shtrihet në 47 institucione…
Partia Demokratike kërkon me urgjencë dorëheqjen e Ulsi Manjës nga detyra e ministrit dhe apelon Spakun të nisë hetimet e menjëhershme për pasurinë e tij…
