Deputeti i Partisë Socialiste, Damian Gjiknuri, gjatë diskutimeve për projektbuxhetin e vitit 2025, ka propozuar rritjen e pensioneve minimale duke rishikuar disa investime publike që nuk janë prioritet.
Gjiknuri vlerësoi progresin ekonomik të vendit, uljen e borxhit publik nën 57% të PBB-së dhe hapësirën e krijuar për politika sociale më të fuqishme.
Ai theksoi rëndësinë e një angazhimi më të madh për të moshuarit, duke shtuar se si një parti e majtë, PS ka detyrimin moral për të mbështetur brezat që kanë kontribuar në ndërtimin e vendit.
“Teksa analizoja siç e përmenda më lart, progresin e rritjes së ekonomisë së vendit, rritjes së Buxhetit të Shtetit dhe uljen e borxhit publik në kufijtë nën 57% të PBB, nuk kam pse të mos mendoj që ka hapësirë buxhetore për të bërë diçka më shumë në mandatin tjetër.
Shteti është si një familje madhe dhe ashtu si në një familje kur mund të kesh në ngarkim edhe shumë anëtarë që nuk janë në gjendje të punojnë, çdo kryefamiljar i përgjegjshëm heq diçka nga vetja, shkurton ndonjë investim apo dhe merr diku borxh për të plotësuar nevojat më imediate të familjareve që nuk janë në gjendje.
Në kohën ku morëm qeverisjen dhe më kujtohet dhe nga puna si ish-minister, na dukej si endërr që Borxhi Publik të arrinte në këto parametra që është sot, pasi në disa raste ai shkoi dhe 72 % PBB.
Duke thënë këtë, mendoj që në të ardhmen të shikohet kjo hapësire fiskale e kombinuar dhe heqjen e ndonjë investimi që nuk është aq prioritar me qellim adresimin e rritjes reale të pensioneve minimale.
Mendoj që si parti e majtë e kemi këtë detyrim njerëzor ndaj brezave para-ardhës të cilët me punën e tyre kanë kredituar dhe një pjesë të asaj çka gëzojmë ne sot. Një injektim i tillë buxhetor nuk duhet të na shqetesojë pasi është kontribut direkt në konsum dhe ekonomi”, theksoi Gjiknuri.
