Rusia ka kërcënuar të sulmojë një bazë të re mbrojtëse amerikane në Poloni duke përdorur “armë të avancuara,” vetëm disa orë pasi raportohet se ka lëshuar një raketë balistike ndërkontinentale drejt Ukrainës të enjten.
Kërcënimi erdhi pasi Moska deklaroi se hapja e bazës së mbrojtjes balistike, e vendosur në qytetin Redzikowo pranë bregut të Baltikut, do të rrisë rrezikun e përgjithshëm bërthamor.
“Duke pasur parasysh natyrën dhe nivelin e kërcënimeve që paraqiten nga këto objekte ushtarake perëndimore, baza e mbrojtjes raketore në Poloni prej kohësh është shtuar në listën e objektivave prioritare për shkatërrim të mundshëm, që, nëse është e nevojshme, mund të realizohet me një gamë të gjerë armësh të avancuara,” deklaroi zëdhënësja e Ministrisë së Jashtme të Rusisë, Maria Zakharova, përcjel NY Post.
Baza e SHBA-së në Redzikowo, e hapur më 13 nëntor, është pjesë e një mburoje më të gjerë raketore të NATO-s, e njohur si “Aegis Ashore,” e cila mund të kapë raketa balistike me rreze të shkurtër dhe të mesme, sipas aleancës.
Zakharova e cilësoi hapjen e bazës si “një hap tjetër provokues” nga SHBA dhe aleatët e saj në NATO, duke shtuar se ajo “minon stabilitetin strategjik dhe rrit rreziqet strategjike, duke çuar në rritjen e nivelit të përgjithshëm të rrezikut bërthamor.”
Polonia ka theksuar se baza nuk përbën kërcënim dhe nuk përmban raketa bërthamore.
“Është një bazë që shërben për qëllime mbrojtjeje, jo sulmi,” deklaroi Pawel Wronski, zëdhënës i Ministrisë së Jashtme të Polonisë. Ai shtoi se kërcënime të tilla vetëm sa do të nxisin forcimin e mbrojtjes ajrore të Polonisë dhe NATO-s, duke përfshirë SHBA-në.
Kërcënimi rus erdhi pas një sulmi ndaj qytetit ukrainas Dnipro, ku forcat ruse përdorën një raketë balistike ndërkontinentale, sipas Forcave Ajrore të Ukrainës.
Raketa u lëshua nga rajoni Astrakhan i Rusisë, rreth 700 kilometra nga Dnipro. Presidenti ukrainas Volodymyr Zelensky, në një deklaratë video, tha:
“Sot pati një raketë të re ruse. Të gjitha karakteristikat — shpejtësia, lartësia — janë të një rakete balistike ndërkontinentale.”
Ky zhvillim shton tensionet në marrëdhëniet midis NATO-s dhe Rusisë, duke theksuar një përshkallëzim të mëtejshëm të situatës ndërkombëtare.
