Presidenti rus Vladimir Putin tha sot se vendi i tij goditi një uzinë në qytetin ukrainas Dnipro duke përdorur një raketë të re balistike hipersonike me rreze të mesme veprimi, raporton Anadolu.
Fillimisht, Forcat Ajrore të Ukrainës pretenduan se Moska lëshoi një raketë balistike ndërkontinentale gjatë një sulmi në qytetin Dnipro herët në mëngjes, gjë që presidenti Volodymyr Zelenskyy e konfirmoi gjithashtu në një fjalim të mëvonshëm me video. Por, ai tha se janë duke u zhvilluar vlerësimet e ekspertëve për të konfirmuar modelin e saktë të raketës së përdorur.
“Një nga komplekset industriale më të mëdha dhe të njohura nga Bashkimi Sovjetik, i cili sot prodhon teknologji raketore dhe armë të tjera, u godit në qytetin Dnipro në Ukrainë”, tha Putin në një fjalim të transmetuar drejtpërdrejt.
Duke vënë në dukje se konflikti në Ukrainë ka fituar “elemente të një natyre globale”, Putin tha se sulmi u krye duke testuar një sistem të ri raketor rus me rreze të mesme të quajtur Oreshnik, i cili tha se, në këtë rast, përdori një raketë balistike me “pajisje hipersonike jobërthamore”.
Kanalet ruse në Telegram më herët gjatë ditës thanë se sulmi kishte në shënjestër uzinën Pivdenmash, prodhuesi shtetëror i fushës së hapësirës ajrore të Ukrainës me seli në Dnipro.
Putin tha se raketa të tilla po zhvillohen nga Rusia në “përgjigje ndaj planeve të SHBA-së për të prodhuar dhe vendosur raketa me rreze të mesme dhe më të shkurtër në Evropë dhe rajonin e Azi-Paqësorit”.
Putin tha më tej se Rusia ka të drejtë të përdorë armë kundër objekteve ushtarake të vendeve që po përdorin armët e tyre kundër Moskës, duke shtuar se përgjigja e Rusisë ndaj përshkallëzimit në Ukrainë do të jetë “vendimtare dhe në natyrë të njëjtë”.
“Unë rekomandoj që elitat në pushtet të atyre vendeve që po hartojnë plane për të përdorur kontigjentet e tyre ushtarake kundër Rusisë, të mendojnë seriozisht për këtë”, shtoi ai.
Autoritetet ukrainase ende nuk kanë konfirmuar nëse uzina Pivdenmash është goditur gjatë sulmit.
