Sali Berisha ka uruar shqiptarët për festën e Flamurit në 28 Nëntor, duke e cilësuar këtë ditë si “festën e festave”.
Ai ka kujtuar ngjarjet e rëndësishme, duke nisur nga ngritja e flamurit nga Skënderbeu në Krujë në 1443, tek ngritja e flamurit nga Ismail Qemali në Vlorë, në vitin 1912.
Berisha ka kritikuar gjithashtu kundërshtarin e tij politik, Edi Ramën, duke e quajtur atë “Pashiqin e Tiranës” dhe ka akuzuar qeverinë aktuale për shkatërrimin e Shqipërisë. Ai ka theksuar se Rama është përgjegjës për një “narkoshtet” dhe se po komploton me Beogradin kundër Kosovës.
Në përfundim, Berisha ka bërë thirrje për një Shqipëri të çliruar nga regjimi i qeverisë aktuale dhe ka nderuar me mirënjohje Ismail Bej Vlorën dhe të gjithë ata që luftuan për Pavarësinë e Shqipërisë.
“Gëzuar 28 Nëntorin, festën e festave!
Miq, sot shqiptarët në Shqipëri dhe kudo jetojnë festojnë 28 Nëntorin si festën e të gjitha festave, Diten e Flamurit tonë kombëtar, ditën e shpalljes nga Ismail Bej Vlora, 112 vite më pare në qytetin e Vlorës, të Pavarësisë së Shqipërisë.
Më 28 Nëntor të vitit 1443 prijësi i përjetshëm i kombit Shqiptar ngriti flamurin e tij, flamurin Kuq e Zi në Krujë. Po në këtë datë të vitit 1944, nga Shqipëria u larguan pushtuesit e huaj dhe hyri si “çlirimtar” Enver Hoxha, i cili pasi shndërroi luftën e shqiptarëve kundër pushtuesve të huaj në një luftë vllavrasëse, do të vendoste në Shqipëri si “Hitleri shqiptar” i Pas Luftës së Dytë Botërore diktaturën staliniste më mizore që shqiptarët kanë njohur në historinë e tyre.
Sot, në ditëlindjen e re të kombit tonë të lashtë, ne nderojmë dhe i përulemi me mirënjohjen më të thellë flamurit tonë kombëtar, babait të Pavarësisë së Shqipërisë, Ismail Bej Vlorës dhe etërve të tjerë të saj. Nderojmë prijësin e përjetshëm të kombit tonë, Skenderbeun dhe qindra mijra shqiptarë që sakrifikuan jetën e tyre në të gjitha kohërat, për liri dhe dinjitet kombëtarë e njerëzor.
Prandaj të dashur miq, ju ftoj t’i urojmë së bashku Shqipërisë dhe mbarë kombit tonë gëzuar këtë ditë, përjetësi, zhvillim dhe begati. Por në festojmë këtë ditë të madhe me diktaturën e narkoshtetit të Edi Ramës, “Pashiqit” të Tiranës, që po shkretëton dhe zbraz sa asnjë pushtim tjetër në histori Shqipërinë nga shqiptarët dhe që komploton ditë e natë me Beogradin kundër Kosovës. Le të na frymëzojnë n dita e Pavarësisë për të çliruar sa më shpejt Shqipërinë nga regjimi i “Pashiqit” të Tiranës.
Duke përfunduar, të dashur miq, le t’i urojmë ne mbarë shqiptarëve: Gëzuar Ditën e Flamurit dhe Pavarësisë. Nderim për jetë, Ismail Bej Vlorës dhe etërve të tjerë të Pavarësisë.
Nderim për jetë të rënëve të kombit tonë. GËZUAR! “
