Konsultime me prindërit për ndalimin e TikTok-ut, Rama: Për këto platforma jemi mallra dhe kode

Kryeministri Edi Rama dhe Ministrja e Arsimit, Ogerta Manastirliu, zhvilluan një takim këshillues me prindërit në shkollën “Janaq Kilica” për të diskutuar ndikimin e rrjeteve sociale, si TikTok, në jetën e fëmijëve dhe adoleshentëve.

Në fjalën e tij, Rama theksoi se fëmijët dhe të rinjtë jetojnë nën një presion të madh nga platformat e mediave sociale dhe nga lajmet shpesh të pasakta që përhapen në to, si dhe nga mediat vendase.

“Jo një por disa nga prindërit duke folur për rrjetet sociale ngriti shqetësimin që presioni i jashtëm i këtyre lloj platformave, mbingarkohet në mënyrë të jashtëzakonshme edhe nga platformat mediatike brenda vendit.

Nuk e sjell këtë këtu për të folur për mediat por për të kornizuar sfidën që ka sot një familje që ka sot edhe të rriturit që janë prindër përballë këtij presioni që rrit tensionin e konfuzionin edhe e bën më të vështirë të kesh qetësinë që duhet që të merresh me pjesën e më të vegjëlve në familje e shkolla.

Edhe mësuesit janë nën këtë presion, një furtunë e madhe lajmesh shpesh gjysmë të vërteta.

Një lum i madh njerëzish që flasin e zihen, një mënyrë komunikimi në mexhilis përmes ekraneve që është shqetësuese, dhe kulmon aty ku normalisht duhet të kishte si minimum një etikë komunikimi që është salla e Kuvendit.

Në gjithë këtë vorbull hyjnë fëmijët që veç të tjerash jetojnë në dy botë komplet paralele, ajo e mediave dhe e klasës-shtëpisë dhe ekraneve të rrjeteve sociale.

Për platformat ne nuk jemi persona, por mallra siç blemë ne në markete me kodet përkatëse, nga kjo vepron edhe algoritmi”, u shpreh ai.