Gjeorgjia ka përjetuar natën e katërt të demonstratave në rrugë dhe një sërë dorëheqjesh publike, të shkaktuara nga vendimi i partisë në pushtet për të pezulluar përpjekjet për nisjen e bisedimeve për anëtarësimin në Bashkimin Evropian.
Ndërsa dhjetëra mijëra gjeorgjianë dolën përsëri në rrugët e disa qyteteve, kryeministri Irakli Kobakhidze tha se ata kishin rënë viktima të gënjeshtrave të opozitës dhe hodhi poshtë thirrjet për zgjedhje të reja.
Ai konfirmoi raportet se ambasadori i Gjeorgjisë në SHBA, David Zakalaliani, ishte diplomati i fundit i lartë që dha dorëheqjen, duke shpjeguar se ai kishte qenë nën presion të madh.
Megjithatë, Kobakhidze u përpoq të mohojë arsyen e protestave, duke thënë të dielën se “ne nuk kemi pezulluar asgjë, kjo është një gënjeshtër”.
Vetëm tre ditë më parë, partia e tij “Ëndrra Gjeorgjiane” kishte akuzuar Bashkimin Evropian për përdorimin e bisedimeve për anëtarësimin në union si “shantazh”, duke shtuar se qeveria kishte vendosur të mos e përfshinte këtë çështje në agjendë deri në fund të vitit 2028.
Protestuesit pro-BE dolën përsëri në numër të madh të dielën në mbrëmje, dhe kur fishekzjarrët u hodhën drejt ndërtesës së parlamentit dhe kundër policisë së trazirave, policia u përgjigj me topa uji.
Grupet e mëdha të policisë të cilat ishin të pranishme në rrugët anësore pranë parlamentit, shpërndanë protestat vetëm të hënën herët në rrugën kryesore Rustaveli.
Ndërkohë që demonstruesit u larguan nga zona, disa persona u arrestuan, përfshirë Zurab Japaridze, një nga liderët e koalicionit opozitar “Koalicioni për Ndryshim”.
Të shtunën, SHBA ndërmori hapin e rëndësishëm për të pezulluar partneritetin e saj strategjik me Gjeorgjinë.
Kobakhidze këmbënguli se Ëndrra Gjeorgjiane ishte ende “e përkushtuar ndaj integrimit evropian… dhe ne po vazhdojmë në rrugën tonë drejt ëndrrës evropiane”.
E megjithatë një grup në rritje i zyrtarëve publikë duket se nuk besojnë se është kështu. Disa ambasadorë kanë dhënë dorëheqjen dhe qindra nëpunës civilë dhe më shumë se 3,000 mësues kanë nënshkruar letra që dënojnë vendimin për të pezulluar pranimin në BE.
Shumë gjeorgjianë janë tronditur nga niveli i dhunës drejtuar gazetarëve gjeorgjianë si dhe protestuesve. Dhjetra gazetarë janë rrahur ose spërkatur piper dhe disa kanë pasur nevojë për trajtim spitalor.
Avokati i popullit të Gjeorgjisë për të drejtat e njeriut, Levan Ioseliani, tha se “ky është brutalitet” dhe ai i bëri thirrje policisë që të mos shpërdorojë pushtetin e saj.
Kryeministri tha se ishin grupet e opozitës dhe jo policia që kishte ushtruar “dhunë sistematike”.
Ish-ambasadorja e Gjeorgjisë në BE Natalie Sabanadze, tani në Chatham House në MB, beson se niveli i dhunës, vargu i dorëheqjeve dhe mosbindjes civile tregojnë një “ndryshim cilësor” në protestat që po ndodhin tani./BBC
