Kryetari i Partisë Demokratike, Sali Berisha, akuzoi qeverinë e Edi Ramës për tentativën e miratimit të një projektligji të paligjshëm në parlament, duke e cilësuar atë një “kallp-ligj”.
Në një konferencë për mediat, Berisha theksoi se ky projektligj synonte faljen e gjobave për ndërtimet pa leje në zonat rurale, megjithëse, sipas tij, këto gjoba janë shpallur antikushtetuese nga Gjykata Kushtetuese.
Berisha u shpreh se Partia Demokratike do të falë të gjitha gjobat për energjinë dhe ujin, si dhe do të dëmshpërblejë të gjitha gjobat e paligjshme për ndërtimet pa leje.
Ai ftoi qytetarët që të mos paguajnë asnjë gjobë, duke i garantuar se çdo shpenzim i bërë në bazë të ligjeve të shpallura antikushtetuese do të kthehet për qindarkë.
“Dje, në një veprim klandestin, narkomazhoranca jashtë çdo lloj procedure parlamentare, kërkoi të fusë në rend dite dhe të votojë një kallp-ligj, sipas të cilit do të faleshin gjobat për lejet e ndërtimit në zonat rurale.
Ky ishte një kallp-ligj dhe një mashtrim i madh sepse me vendim të Gjykatës Kushtetuese, ligji i miratuar për vendosjen e këtyre gjobave është shpallur antikushtetues.
Në këtë kuadër, çdo qeveri është e detyruar të rikthejë çdo gjobë të vënë bazuar në këtë ligj.
Por narko-shteti, narko-diktatura, e cila njeh vetëm vullnetin e padrinos dhe kreut të krimit, pavarësisht nga vendimi i Gjykatës Kushtetuese, ka vazhduar praktikën antikushtetuese të gjobitjes së qytetarëve dhe tani së fundmi bën sikur po i fal gjobat, në një kohë kur ato kanë qenë të gjitha të paligjshme.
Ndaj dënoj këtë mashtrim publik dhe garantoj çdo qytetar që janë gjobitur mbi bazën e atij ligji antikushtetues, nga data e hyrjes në fuqi gjer sot, se ata do të dëmshpërblehen, do u kthehet qindarkë për qindarkë e gjithë shuma e gjobës që kanë paguar.
Ftoj çdo qytetar të mos paguajë një qindarkë gjobë antikushtetuese.
Sikundër deklaroj se PD do të falë të gjitha gjobat për pensionistët, për familjet në nevojë, për punonjësit me rroga mesatare e poshtë, për familjet me nëna kryefamiljare, për të gjithë familjet në ndihmë ekonomike, në papunësi, do falen të gjitha gjobat e energjisë elektrike dhe ujit të pijshëm.
Ftoj këto familje të mos paguajnë asnjë qindarkë, pasi këto gjoba do të jenë 100 përqind të falura”, u shpreh Berisha.
