Rebelët sirianë, të udhëhequr nga grupi islamist militant Hayat Tahrir al-Sham (HTS), janë duke avancuar me shpejtësi drejt qytetit të Homsit, qyteti i tretë më i madh në Siri.
Pasi morën kontrollin e qytetit Hama në veri ditën e djeshme, rebelët kanë goditur ndjeshëm regjimin e Presidentit Bashar al-Assad, i cili vetëm javën e kaluar humbi kontrollin e Alepos.
Lideri i HTS, në një deklaratë të bërë publike, tha se qëllimi kryesor i këtyre ofensivave është rrëzimi i regjimit të Assad-it, përcjell BBC.
Ky është një zhvillim që shënon sfidën më të madhe për qeverinë siriane që nga kulmi i luftës civile në vitin 2011.
Marrja e Hama-s, një qytet strategjik që ndodhet mes Alepos dhe Damaskut, ka qenë një goditje e rëndë për forcat qeveritare.
Rebelët po përparojnë me shpejtësi drejt Homsit, një tjetër qytet me rëndësi të madhe strategjike dhe simbolike për regjimin. Sipas raportimeve nga terreni, ofensiva ka qenë e organizuar mirë dhe po ndihmohet nga armë të avancuara dhe logjistikë e fuqishme.
Ndërkohë, në pjesën lindore të vendit, forcat kurde të udhëhequra nga Forcat Demokratike Siriane (SDF) kanë marrë kontrollin e qytetit Deir al-Zour, duke goditur edhe më shumë regjimin e Assad-it në disa fronte njëkohësisht.
Rusia, aleati më i madh i regjimit sirian, ka bërë një thirrje urgjente që qytetarët e saj të largohen nga Siria.
Ky zhvillim vjen në një moment kur Moska duket se po shqetësohet për përshkallëzimin e situatës dhe për humbjet e njëpasnjëshme të forcave qeveritare.
Përparimet e fundit të rebelëve, të kombinuara me fitoret e kurdëve, kanë krijuar një situatë të re dhe të paqëndrueshme në Siri. Bashkë me thirrjen e Rusisë për evakuimin e qytetarëve të saj, këto zhvillime kanë theksuar se regjimi i Assad-it ndodhet në një pikë kritike.
Ekspertët paralajmërojnë se këto zhvillime mund të kenë pasoja të thella për stabilitetin e rajonit, duke përfshirë edhe një përshkallëzim të mundshëm të konfliktit mes palëve të përfshira dhe ndikimeve ndërkombëtare.
Forcat qeveritare janë nën presion të madh, ndërsa komuniteti ndërkombëtar ndjek me shqetësim situatën.
