Notre Dame, katedralja ikonike e Parisit, ka rihapur dyert e saj pesë vite pas zjarrit shkatërrues që shkatërroi çatinë dhe kullën e saj karakteristike më 15 prill 2019.
Një ceremoni madhështore dy-ditore filloi sot me praninë e liderëve botërorë, përfshirë presidentin francez Emmanuel Macron dhe presidentin e zgjedhur amerikan Donald Trump.
Kryepeshkopi Laurent Ulrich udhëhoqi ceremoninë, duke trokitur në dyert e katedrales me shkopin e tij baritor, si pjesë e ritit tradicional.
Pas këndimit të një psalmi nga brenda, organo antike e katedrales u bekua dhe nisi të luante për të shënuar fillimin e shërbimit fetar.
Takim Macron-Zelenskyy-Trump
Në një moment kyç për politikën ndërkombëtare, Macron organizoi një takim me presidentin ukrainas Volodymyr Zelenskyy dhe presidentin e zgjedhur Trump para ceremonisë.
Takimi vjen ndërsa këshilltarët e Trump po propozojnë plane për t’i dhënë fund luftës në Ukrainë, duke lënë nën kontrollin rus disa pjesë të vendit.
Zelenskyy e cilësoi takimin si “të mirë dhe produktiv”, duke theksuar përkushtimin për një paqe të drejtë.
Në fjalën e tij të hapjes, Macron deklaroi se kambanat e Notre-Dame “kanë shoqëruar historinë tonë” dhe theksoi se kjo ngjarje është një mësim i rëndësishëm mbi “brishtësinë, përulësinë dhe vullnetin” që duhet të ruhen.
Ai u kujtoi të pranishmëve rëndësinë e kontributit individual, duke thënë:“Madhështia e kësaj katedraleje është e pandashme nga puna e të gjithëve.”
Rreth 1,500 të ftuar, përfshirë liderë botërorë dhe personalitete të shquara, morën pjesë në ceremoni.
Katedralja tashmë ka rikthyer kambanat e saj historike, të cilat u dëgjuan për herë të parë pas zjarrit të vitit 2019.
Katedralja 850-vjeçare ishte dëmtuar rëndë nga zjarri i vitit 2019, duke humbur kullën dhe çatinë e saj ikonike.
Puna intensive e rikonstruksionit, e udhëhequr nga arkitektë dhe artizanë të specializuar, ka rikthyer lavdinë e saj historike, duke ruajtur detajet unike gotike që e bëjnë Notre Dame një monument botëror.
Kjo ceremoni shënon jo vetëm rikthimin e një simboli të trashëgimisë kulturore, por edhe një moment bashkimi ndërkombëtar në zemër të Parisit.
I ftuar në ceremoninë e hapjes ishte gjithashtu edhe kryeministri Edi Rama
“Sonte në ceremoninë e rihapjes së Katedrales Notre-Dame de Paris, ku edhe Shqipëria ka kontribuar modestisht për rindërtimin pas zjarrit të pesë viteve më parë”, postoi Rama në rrjetet sociale.
Prezente gjithashtu ishte edhe presidentja e Kosovës, Vjosa Osmani, e cila shtrëngoi duart me presidentin e zgjedhur amerikan, Donald Trump. Vet Osmani e ka shpërndarë një fotografi nga kjo ngjarje.
“Me Presidentin Trump, në ceremoninë e rihapjes së Katedrales së Parisit ‘Notre Dame’”, shkroi Osmani në Facebook.
Ndiqni ceremoninë LIVE në videoja e mëposhtme:
