Konservatorët e Gjermanisë do bëjnë fushatë në zgjedhjet e parakohshme të shkurtit mbi një platformë të uljes së taksave dhe kontrolleve më të ashpra mbi emigracionin e paligjshëm, sipas një projektmanifesti të parë nga Financial Times.
Dokumenti prej 79 faqesh premton “politika të reja” që do sigurojnë që Gjermania të ecë përpara.
Manifesti, që do zbulohet zyrtarisht për publikun të martën, shënon një shkallë të habitshme vazhdimësie me politikat e kancelarit Olaf Scholz, veçanërisht për çështje të tilla si ofrimi i mbështetjes ushtarake për Ukrainën.
Por për emigracionin, konservatorët premtojnë një qasje shumë më të ashpër se ajo e qeverisë në largim.
“Ne duhet të vendosim edhe një herë vetë se kush vjen tek ne dhe kush mund të qëndrojë”, thuhej në manifest.
Unioni Kristian Demokrat (CDU) dhe partia e saj motër bavareze, Unioni Kristian Social (CSU) – shpesh i referuar kolektivisht si “Unioni” – janë favoritë për të fituar zgjedhjet, duke krijuar një epërsi komanduese mbi partitë e tjera.
Zgjedhjet e parakohshme u bënë të pashmangshme muajin e kaluar kur Scholz u tërhoq nga koalicioni i tij qeverisës i socialdemokratëve (SPD), të Gjelbërve dhe Liberalëve.
Scholz, i cili drejton një qeveri të pakicës SPD-Green, do përballet me një votë besimi në Bundestag të hënën, të cilën ai ka të ngjarë ta humbasë; presidenti më pas do shpërndajë legjislativin dhe do caktojë zgjedhje të parakohshme.
Duke premtuar një “axhendë për punëtorët e palodhur”, projektprogrami zgjedhor i CDU/CSU propozon ulje të tatimit mbi të ardhurat për njerëzit me të ardhura të ulëta dhe të mesme, një ulje të kontributeve të sigurimeve shoqërore dhe një rënie të përshkallëzuar të taksimit të korporatave në 25 për qind, nga rreth 30 për qind që është tani.
Partitë duan gjithashtu të shfuqizojnë plotësisht “Soli”, një shtesë mbi tatimin mbi të ardhurat që u prezantua për herë të parë në vitet 1990 për të paguar për ribashkimin gjerman si dhe rivendosjen e subvencioneve të karburantit për fermerët, duke ulur tatimin mbi vlerën e shtuar në sektorin e turizmit në 7 për qind – nga 19 për qind që është tani – dhe rritjen e shtesave për tatimin mbi trashëgiminë.
Është e paqartë se si Unioni planifikon të financojë uljen e taksave. Ai mbetet e përkushtuar ndaj “frenimit të borxhit”, kufirit kushtetues të Gjermanisë për huamarrjen e re, për të cilin kritikët thonë se detyron një shtrëngim shpenzimesh ndaj qeverisë në një kohë kur vendi kërkon investime të mëdha në mbrojtje, infrastrukturë dhe tranzicionin e gjelbër.
“Borxhet e sotme janë taksat e së nesërmes”, thotë manifesti.
Pavarësisht sulmeve të tyre shpesh të zjarrta ndaj kulturës së përfitimeve të Gjermanisë, ata nuk propozojnë ndonjë ndryshim të madh në shtetin e mirëqenies. Ata kundërshtojnë shkurtimet e pensionit shtetëror dhe çdo rritje të moshës së daljes në pension – megjithëse mbrojnë një “pension aktiv” që do lejonte këdo që punon përtej moshës së pensionit të fitojë deri në 2,000 euro në muaj pa taksa.
Ata duan të shfuqizojnë Bürgergeld, ose “paratë e qytetarëve”, sistemin e pagesave të mirëqenies për të varfërit, për të cilin të djathtët thonë se i ngjan të ardhurave bazë universale. Ata duan ta zëvendësojnë atë me një “sigurim të ri bazë”, i cili do t’u mohohet atyre që kundërshtojnë ofertat e punës.
Ndryshe nga të Gjelbrit dhe SPD, CDU/CSU thotë se energjia bërthamore duhet të jetë një “mundësi” për Gjermaninë dhe mbështet kërkimin në reaktorët e vegjël modularë dhe shkrirjen bërthamore. Ata propozojnë gjithashtu një anulim të ndalimit të makinave me benzinë dhe naftë.
Për sa i përket politikës së jashtme, ata thonë se janë të përkushtuar për mbrojtjen e Ukrainës, e cila duhet të mbështetet me “mjete diplomatike, financiare dhe humanitare, si dhe me furnizime me armë”, dhe për “ringjalljen e marrëdhënieve tona me Francën dhe Poloninë”.
Palët thonë se Gjermania duhet të shpenzojë një minimum prej 2 për qind të PBB-së së saj për ushtrinë, të prezantojë një vit shërbimi ushtarak të detyrueshëm për të rinjtë – edhe pse ata nuk kërkojnë rikthim në rekrutim ushtarak – dhe të ngrejë një këshill të sigurisë kombëtare qëdo kontrollohet nga Kancelari.
Unioni thotë gjithashtu se nëse vjen në pushtet, do t’u japë agjencive të zbatimit të ligjit aftësinë për të kthyer emigrantët në kufi si një mjet për “ndalimin e emigrimit të paligjshëm” dhe do rrisë dëbimet e të huajve nga toka gjermane.
Ajo gjithashtu dëshiron të shohë futjen e “modelit të vendeve të treta ” në BE, sipas të cilit refugjatët do shqyrtojnë kërkesat e tyre për azil jashtë bllokut dhe do marrin mbrojtje atje.
Konservatorët do shfuqizojnë gjithashtu një ligj të miratuar nga qeveria Scholz që u mundëson të huajt të marrin shtetësinë gjermane pasi të kenë jetuar në vend për pesë vjet, dhe gjithashtu do lejojë shtetësinë e dyfishtë.
“Pasaporta gjermane qëndron në fund të procesit të integrimit, jo në fillim”, thuhet në manifest.
VINI RE: Ky material është pronësi intelektuale e Financial Times
Përgatiti për Hashtag.al, Klodian Manjani
