Kryeparlamentarja Elisa Spiropali, gjatë mbledhjes së përbashkët mes Kuvendit të Kosovës dhe Shqipërisë në Prishtinë, theksoi se dialogu mes Kosovës dhe Serbisë duhet të përfundojë me njohjen e ndërsjellët dhe përfundimtare.
Ajo theksoi se pa një marrëveshje të tillë, ky rajon do të vazhdojë të mbetet një “dhembje koke” për banorët e tij. Spiropali shtoi se sfidat që ka Kosova janë të kuptueshme dhe janë gjithashtu sfida për Shqipërinë, që burojnë nga e drejta natyrore dhe Kushtetuta e saj.
Kryeparlamentarja kërkoi një marrëveshje ligjore që mundëson njohjen e Kosovës, anëtarësimin e saj në OKB dhe BE, si dhe trajtimin e minoriteteve sipas Kushtetutës.
Elisa Spiropali: Sfidat specifike që Kosova ka janë te kuptueshme dhe janë njëherazi edhe sfidat tona që burojnë nga e drejta e natyrshme dhe Kushtetuta jonë.
Dialogu Kosovë-Serbi, në koordinim të plotë me partnerët tanë të përbashkët strategjikë, SHBA dhe BE, duhet të ketë medoemos si rezultat përfundimtar nënshkrimin e një marrëveshje të detyrueshme ligjore që mundëson njohjen e ndërsjellët mes dy vendeve, anëtarësimin e Kosovës në OKB dhe BE, si edhe trajtimin e minoriteteve komform Kushtetutës.
Pa njohje të ndërsjellë dhe përfundimtare, pa dalje me guxim nga labirinthet artificiale që krijohen nga interesa të ditës, por edhe të votës, ky skaj i Evropës do të jetë gjithmonë një dhembje koke për banorët e tij.
Kemi bindjen e palëkundur se Kosova do ta përmbyllë këtë proces si një shtet me vizion euroatlantik, si një partner strategjik.
