Kryetari i Partisë Demokratike, Sali Berisha, gjatë fjalës së tij në trajnimin dy-ditor për Forumin Rinor të Partisë Demokratike të Shqipërisë i ka bërë thirrje të rinjve të angazhohen fuqishëm në fushatën për zgjedhjet e 11 majit, duke theksuar se ata kanë një rol kyç në arritjen e fitores.
Berisha theksoi se fitorja do të arrihet vetëm nëse të rinjtë bëhen imazhi i fushatës, pasi energjia, përkushtimi dhe imazhi i tyre janë thelbësore për suksesin.
Ai shtoi se aktualisht nuk është në lojë një diktaturë komuniste, por një narkodiktaturë, duke e cilësuar sfidën si një mision për të përmbushur, jo vetëm një zgjedhje.
Berisha u shpreh i bindur se nëse të rinjtë dominon skenën e fushatës, kundërshtarët do të “shkatërrohen”.
“Sot, ne nuk kemi një diktaturë komuniste përpara, kemi një narkodiktaturë përpara.
Çfarë do të thotë se nuk kemi një zgjedhje përpara, por kemi një mision përpara. Kemi një mision për të përmbushur. Dhe ky mision është fitorja e zgjedhjeve të 11 majit. Kjo fitore, e them me bindjen time më të thellë se rol vendimtar keni ju.
Energjia juaj, përkushtimi juaj, por edhe imazhi juaj, janë të një rëndësie themelore për këtë fitore. Në qoftë se ju bëheni imazhi i kësaj fushate, kundërshtari shkatërrohet.
Po të dilni ju në skenë dhe ta dominoni imazhin, ata nuk ka njeri dëshirë t’i shohë, le të lustrohen të bëjnë ç’të duan, nuk kanë krahasim me ju. Energjia juaj është e pashtershme. Sapo u takova me zotërinjtë e nderuar, çfarë po flisnim, ua kanë thënë edhe ju. Të regjistrojmë çdo ditë në sa dyer trokitëm, të regjistrojmë çdo ditë sa duar shtrënguam, çfarë mesazhi dhamë.
Pra, e shihni ju se fitorja është në duart tona? Kështu që ju ftoj të frymëzuar edhe nga këto leksione dhe mësime që morët, ta vazhdojmë këtë betejë me bindje të plotë në fitoren që na pret.”
