Elon Musk ka shprehur mbështetjen e tij për një parti politike gjermane të spektrit të djathtë duke trazuar jo pak politikën në Gjermani e SHBA.
Musk, aleati i miliarderit të Trump, i cili po luan rol publik në administratën e ardhshme, postoi të premten në X mbështetjen e tij për Alternativën për Gjermaninë, ose AfD, pasi qeveria gjermane ra këtë javë.
“Vetëm AfD-ja mund ta shpëtojë Gjermaninë,” shkroi Musk të premten ndërsa ripostoi një video nga aktivistja politike e kësaj force politike Naomi Seibt.
AfD-ja, që kohët e fundit ka parë rritje të popullaritetit, ka mbrojtur pozicionet populiste dhe antiemigrante nën moton “Gjermania e para”. Por partia është akuzuar gjithashtu për ringjalljen e ideologjisë dhe parullave të epokës naziste. Në maj, një gjykatës vendosi që agjencia e brendshme e inteligjencës gjermane mund të vazhdojë ta mbajë AfD-në nën vëzhgim për kërcënimin e supozuar që paraqet për demokracinë gjermane.
Krahu i saj rinor, Alternativa e Re (JA), është caktuar nga autoritetet gjermane si një organizatë “ekstremiste e konfirmuar”. Kandidati kryesor i partisë në shtetin lindor gjerman të Turingen, Björn Höcke, u dënua në fillim të këtij viti pasi kishte thyer ligjet gjermane kundër shqiptimit të parullave naziste në publik.
Por partia ka parë mbështetje në rritje. AfD kohët e fundit u bë partia e parë e ekstremit të djathtë që fitoi zgjedhjet shtetërore në Gjermani që nga epoka naziste, megjithëse të gjitha partitë kryesore politike të vendit kanë thënë se nuk do ulen me ta në një koalicion, i cili do jetë i nevojshëm për të formuar vende të mjaftueshme për një qeveri në pushtet.
Nuk është hera e parë që Musk ndërhyn në politikën gjermane. Në qershor, ai iu përgjigj një videoje të Seibt ku pyeti: “Pse ka një reagim kaq negativ nga disa për AfD? Ata vazhdojnë të thonë “e djathta ekstreme”, por politikat e AfD-së për të cilat kam lexuar nuk duken ekstremiste. Ndoshta më mungon diçka”, ka shkruar ai. Dhe muajin e kaluar ai e quajti kancelarin gjerman Olaf Scholz “budalla” pasi koalicioni i tij qeverisës u shemb.
Të premten, Musk vijoi të postonte në lidhje me AfD-në, duke shkruar në përgjigje të postimit të një përdoruesi në lidhje me politikën e emigracionit të partisë se “duket e arsyeshme”.
Musk filloi të ndiqte drejtuesen e AfD-së Alice Weidel në X, e cila iu përgjigj miratimit të tij, duke postuar një video ku shprehte mirënjohjen.
“Alternativa për Gjermaninë është vërtetë alternativa e vetme dhe e vetme për vendin tonë; mundësia jonë e fundit. Ju uroj juve dhe Presidentit Donald Trump gjithë të mirat për mandatin e ardhshëm!” shkroi ajo.
