Mandarina, simbol i fundit të vitit për shqiptarët, është përballur me një tjetër pengesë serioze në rrugën drejt eksportit. Për të katërtën herë, Bashkimi Evropian ka bllokuar eksportet shqiptare të mandarinave për shkak të përdorimit të pesticideve të ndaluara, një standard larg normave të BE-së.
Ky fakt jo vetëm që ka dëmtuar imazhin e produkteve shqiptare, por ka ndikuar drejtpërdrejt edhe në sigurinë ushqimore të qytetarëve.
Sipas deputetes Jorida Tabaku, ky është një tjetër tregues i paaftësisë së qeverisë për të menaxhuar sektorin e bujqësisë dhe për të garantuar standardet bazë të sigurisë ushqimore. Ajo theksoi se fondet për sigurinë ushqimore janë ulur me 145 milionë lekë vetëm në shtator të vitit të kaluar, duke krijuar një boshllëk të madh në kontrollin e produkteve bujqësore që konsumohen brenda dhe eksportohen jashtë vendit.
“Siguria ushqimore mungon, kontrolli mungon dhe fondet e bujqësisë janë zvogëluar ndjeshëm. Si pasojë, kemi produkte që nuk shiten në tregjet evropiane, jo vetëm për shkak të mungesës së kontrollit, por edhe për shkak të dështimit të politikave të qeverisë,” u shpreh Tabaku në një video mesazh.
Ajo shtoi se ulja e fondeve për bujqësinë dhe dështimi i skemave mbështetëse, si ajo e TVSH-së dhe fondet IPARD, kanë bërë që produktet shqiptare të mos konkurrojnë në tregje ndërkombëtare. Tabaku e konsideroi këtë situatë si pasojë direkte të korrupsionit dhe paaftësisë në menaxhimin e fondeve shtetërore.
“Korrupsioni është pesticidi më i rrezikshëm i ekonomisë shqiptare,” deklaroi ajo, duke nënvizuar se përparimi i bujqësisë duhet të jetë prioritet kombëtar për të mbështetur mbi 300 mijë familje shqiptare që jetojnë nga ky sektor.
Për Tabakun, zgjidhja është e qartë: rritja e fondeve për sigurinë ushqimore, forcimi i kontrolleve dhe krijimi i një plani konkret për të mbështetur fermerët shqiptarë që të sjellin në treg produkte të cilësisë së lartë.
Situata aktuale tregon qartë që një buxhet që nuk mbështet bujqësinë, në fakt, mbështet korrupsionin dhe varfërinë. Shqiptarët në zonat rurale po përballen me kushte gjithnjë e më të vështira, ndërsa qytetarët në zonat urbane detyrohen të konsumojnë produkte të importit, edhe pse Shqipëria ka potencial të madh për të siguruar prodhime vendase të cilësisë së lartë.
“Mandarina, një nga frutat më të dashur për shqiptarët në fund të vitit, po bllokohet përsëri në pikat kufitare kur tentohet eksporti i saj. Arsyeja? Përdorimi i pesticideve të ndaluara, larg standardeve dhe normave të Bashkimit Evropian. Kjo ka dëmtuar cilësinë e produktit dhe ka mbyllur derën për eksportet shqiptare.
Ky problem është një njollë e keqe jo vetëm për eksportet, por edhe për sigurinë ushqimore në vend. Ajo që i hidhet këtyre produkteve, nga fusha deri në tryezën e shqiptarëve, nuk kontrollohet siç duhet. Për më tepër, buxheti për sigurinë ushqimore është ulur me 145 milionë lekë vetëm vitin e kaluar.
Kjo situatë është pasojë e politikave të dështuara të qeverisë, si skema e TVSH-së që po falimenton sektorin, dhe mungesa e fondeve IPARD që duhej të ndihmonin bujqësinë. Problemet grumbullohen njëri pas tjetrit, duke bërë që produktet shqiptare të mos jenë konkurruese në tregjet evropiane.
Zgjidhja ekziston dhe është e qartë: ky sektor duhet të bëhet prioritet për ato 300 mijë familje që mbështeten në bujqësi. Shqipëria ka potencialin të jetë një lider në tregjet evropiane, por kjo kërkon angazhim dhe mbështetje reale.”
