Të paktën 176 nga 181 personat në bordin e një avioni që doli nga pista dhe u përplas me një mur në një aeroport në Korenë e Jugut mendohet të kenë humbur jetën, sipas autoriteteve të zjarrfikësve, raporton agjencia Yonhap.
Nëse konfirmohet, kjo do të shënojë katastrofën më të rëndë ajrore civile brenda vendit në historinë e Koresë së Jugut.
Pamjet e aksidentit treguan avionin Boeing 737-800 duke rrëshqitur në pistën e aeroportit ndërkombëtar të Muan mëngjesin e së dielës përpara se të godiste një mur betoni me shpejtësi të lartë dhe të shpërthente në flakë, ndërsa pjesë të trupit të avionit shpërndaheshin në ajër.
Një zyrtar lokal i zjarrfikësve tha se aksidenti mund të jetë shkaktuar nga një përplasje me një zog dhe kushtet e këqija atmosferike. Sipas Yonhap, përplasja mund të ketë shkaktuar dështimin e uljes së rrotave të avionit, duke detyruar pilotët të tentonin ulje të përsëritura.
Shefi i zjarrfikësve të Muan, Lee Jeong-hyun, tha: ‘Shkaku i aksidentit mendohet të jetë një përplasje me zogjtë dhe kushtet e pafavorshme të motit. Megjithatë, shkaku përfundimtar do të përcaktohet pas hetimeve të përbashkëta.’”
Ndërkohë që ekipet e shpëtimit po vazhdojnë kërkimet në vendin e aksidentit, më shumë se 100 familjarë të pasagjerëve të avionit janë mbledhur në aeroport për të marrë informacione mbi të afërmit e tyre.
Në një moment emocional, Lee u tha familjeve se shumica e pasagjerëve mendohet të kenë humbur jetën, duke shkaktuar lot dhe klithma dhimbjeje.
“Nuk ka shpresë për të mbijetuar?” pyeti një i afërm, ndërsa shefi i zjarrfikësve u përkul me keqardhje dhe tha: “Më vjen shumë keq, por duket se ky është realiteti.”
Avioni dhe detajet e aksidentit
Aksidenti ndodhi rreth orës 9:00 të mëngjesit, menjëherë pasi avioni, Jeju Air fluturimi 7C2216, u ul në aeroportin 300 km në jugperëndim të Seulit, pas një fluturimi nga Bangkoku.
Dëshmitarët përshkruan momente paniku. Yoo Jae-yong, 41 vjeç, tha se kishte parë shkëndija në krahun e djathtë të avionit para incidentit. “Unë po u thosha familjarëve se diçka nuk shkonte me avionin kur dëgjova shpërthimin e fortë,” tha Yoo.
Një tjetër dëshmitar, Kim Yong-cheol, 70 vjeç, tha se avioni tentoi të ulej dy herë përpara se të përplasej.
“Dëgjova një zhurmë metalike dhe më pas shpërthimin, ndërsa pashë tymin e zi që ngrihej në qiell,” tregoi ai.
Reagimi i kompanisë ajrore dhe hetimet
Jeju Air, një kompani ajrore me kosto të ulët, ndryshoi faqen e saj në një sfond të zi si shenjë zie dhe kërkoi falje.
“Jeju Air përkulen me ndjesë për të gjithë të prekurit nga aksidenti në aeroportin e Muanit. Prioriteti ynë i parë është menaxhimi i kësaj situate,” thuhet në një deklaratë të kompanisë.
Ekspertët thanë se industria ajrore e Koresë së Jugut ka një histori të mirë sigurie, dhe ky është aksidenti i parë fatal për Jeju Air që nga themelimi i saj në vitin 2005.
Megjithatë, vendi ka përjetuar aksidente të mëdha në të kaluarën, përfshirë përplasjen e vitit 1993 të Asiana Airlines në Mokpo, ku humbën jetën 68 persona, dhe aksidentin e Air China në vitin 2002 pranë aeroportit Gimhae, ku humbën jetën 129 pasagjerë.
Aksidenti ndodhi tre javë pasi linja ajrore Muan-Bangkok u hap më 8 dhjetor si pjesë e planeve për zgjerimin e destinacioneve ndërkombëtare.
Hetimet e plota do të vazhdojnë ndërsa autoritetet përpiqen të zbardhin shkaqet e tragjedisë dhe të identifikojnë viktimat.
