Në 34-vjetorin e krijimit të gazetës “Rilindja Demokratike”, kryetari i Partisë Demokratike Euroatlantike, Lulzim Basha, ka vlerësuar guximin e gazetarëve dhe intelektualëve që sollën fjalën e lirë në Shqipëri, duke hapur një epokë të re për demokracinë dhe shtypin e pavarur.
Në një postim të tij në rrjetet sociale, Basha theksoi se guximi i atyre që kontribuan për median e lirë është një frymëzim për ata që sot besojnë se shtypi i pavarur është shtylla e një shoqërie demokratike.
Basha shprehu shqetësimin për sfidat që po kalon liria e medias në vend, duke përmendur kërcënimet ndaj gazetarëve, autocensurën dhe mungesën e transparencës nga institucionet shtetërore. Ai theksoi se pa një shtyp të pavarur, nuk mund të ketë as demokraci funksionale dhe as zhvillim të qëndrueshëm.
“5 Janari shënon 34 vjet nga dita kur “Rilindja Demokratike” solli për herë të parë fjalën e lirë në Shqipëri, duke hapur një kapitull të ri për demokracinë dhe shtypin e pavarur. Guximi i gazetarëve dhe intelektualëve të asaj kohe mbetet një frymëzim për të gjithë ata që edhe sot besojnë se media e lirë është shtylla e një shoqërie demokratike.
Ndërkohë, liria dhe pluralizmi i medias në vendin tonë rrezikohet: nga mungesa e sigurisë për gazetarët, kërcënimet e pavarësisë editoriale, presionet politike dhe ekonomike, autocensura, deri te mbyllja e dyerve për transparencë nga institucionet. Por, pa një shtyp të pavarur, nuk mund të ketë demokraci funksionale as zhvillim të qëndrueshëm.
Në këtë 34 vjetor të Rilindjes Demokratike, u shpreh respektin dhe mirënjohjen time të thellë të gjithë atyre që kanë kontribuar ndër vite për ta bërë këtë media një tribunë të fjalës së lirë, por edhe gjithë gazetarëve dhe redaksive që vazhdojnë të qëndrojnë në llogore të informimit të pavarur, në shërbim të interesit publik.
Le të jetë kjo ditë një kujtesë e rëndësishme për domosdoshmërinë e mediave të pavarura në mbrojtjen e së vërtetës, interesit publik dhe të ardhmes demokratike të Shqipërisë”, shkruan ai.
