Qeveria e Brazilit tha në një deklaratë të hënën se Indonezia po i bashkohet zyrtarisht BRICS-it si anëtare e plotë, duke zgjeruar më tej grupin e ekonomive të mëdha në zhvillim që përfshin gjithashtu Rusinë, Indinë, Kinën dhe Afrikën e Jugut.
Indonezia, kombi i katërt më i populluar në botë, kishte shprehur më parë dëshirën e saj për t’u bashkuar me grupin si një mjet për të forcuar vendet në zhvillim dhe për të çuar përpara interesat e të ashtuquajturit Jugu Global.
Brazili, i cili mban presidencën e bllokut në vitin 2025, tha se shtetet anëtare miratuan hyrjen e Indonezisë me konsensus si pjesë e një shtytjeje për zgjerim të miratuar fillimisht në samitin e bllokut të vitit 2023 në Johanesburg.
Brazili vuri në dukje se oferta e Indonezisë mori dritën jeshile nga blloku në vitin 2023, por vendi aziatik kërkoi të bashkohej pas zgjedhjeve presidenciale të mbajtura vitin e kaluar. Presidenti Praboëo Subianto mori detyrën në tetor.
“Indonezia ndan me anëtarët e tjerë të grupit mbështetjen për reformën e institucioneve të qeverisjes globale dhe kontribuon pozitivisht në thellimin e bashkëpunimit në Jugun Global”, tha qeveria braziliane.
Grupi BRICS përfshin gjithashtu Egjiptin, Etiopinë, Iranin dhe Emiratet e Bashkuara Arabe.
