Korrupsioni është kërcënimi më i madh për Partinë Komuniste të Kinës, tha presidenti Xi Jinping të hënën, në një paralajmërim të qartë se partia në pushtet është e vendosur për të trajtuar një problem afatgjatë që tani është rrënjosur në shumë shtresa të shoqërisë kineze.
Kina u trondit vitin e kaluar nga hetimet e korrupsionit ndaj individëve të profilit të lartë, duke filluar nga një zëvendësguvernator i Bankës Qendrore deri te një ish-kryetar i kompanisë së saj më të madhe të naftës dhe gazit, duke shtuar shqetësimin në një ekonomi që po përballet me pasiguri dhe një shoqëri që po has një ndjesi të zbehjes së pasurisë.
Jo vetëm që korrupsioni është ende në Kinë, por në fakt është në rritje, tha Xi në fillim të një kongresi treditor të Komisionit Qendror për Inspektimin e Disiplinës (CCDI), mbikëqyrësi më i lartë i vendit kundër ryshfetit.
“Korrupsioni është kërcënimi më i madh për partinë tonë”, paralajmëroi ai.
Për të nënvizuar shkallën e problemit, CCDI tha ditët e fundit se një rekord prej 58 “tigrash” (zyrtarë të lartë), u hetuan vitin e kaluar.
Nga ata që u hetuan, 47 ishin në nivel zëvendësministror ose më lart, duke përfshirë Tang Renjian, ish-ministër i Bujqësisë dhe Gou Zhongwen, ish-kreu i Administratës së Përgjithshme të Sportit.
Nuk u kursyen as ish-zyrtarët e rangut të lartë, si Wang Yilin, i cili dha dorëheqjen si kryetar i China National Petroleum Corp në pronësi shtetërore në vitin 2020 me arritjen e moshës së pensionit.
Goditja do vijojë, tha Andrew Wedeman, një profesor në Universitetin Shtetëror të Xhorxhias.
“Unë nuk e shoh se si Xi mund të tërhiqet në këtë pikë,” tha Wedeman.
Ushtria Çlirimtare Popullore e Kinës (PLA) gjithashtu është përfshirë nga një valë spastrimesh që nga viti 2023. Li Shangfu u hoq nga posti i ministrit të Mbrojtjes pas shtatë muajsh dhe paraardhësi i tij Wei Fenghe u përjashtua nga partia për “shkelje të rënda të disiplinës”, një eufemizëm për korrupsionin.
