Presidenti kinez Xi Jinping do dërgojë krahun e tij të djathtë në ceremoninë e betimit të presidentit të zgjedhur amerikan Donald Trump, që mbahet më 20 janar.
Pekini i ka thënë ekipit të tranzicionit të Trump se zyrtari do merrte pjesë në vend të Xi, të cilin Trump e kishte ftuar të merrte pjesë, thuhet në raport. Ai tha se i dërguari do zhvillonte gjithashtu bisedime me ekipin e Trump.
Xi mund të dërgojë Han Zheng, që është zv.president dhe që ndonjëherë e zëvendëson atë në role ceremoniale, ndërsa një mundësi tjetër ishte ministri i Jashtëm Wang Yi, raportoi FT, duke cituar burimet e saj.
Gazeta citoi një person të njohur me situatën të thoshte se disa këshilltarë të Trump dëshironin në ceremoni Cai Qi, një anëtar i Komitetit të Përhershëm të Byrosë Politike që sipas tyre ka shumë më tepër pushtet se Han ose Wang.
Ambasada e Kinës në Uashington dhe ekipi i tranzicionit i Trump nuk iu përgjigjën menjëherë kërkesave për koment.
Trump ia bëri ftesën Xi-së muajin e kaluar, por ekspertët thanë se do ishte e paparë që një president i Kinës, rivali më i ashpër gjeopolitik i SHBA-së, të merrte pjesë në betimin presidencial të SHBA-së dhe e quajti atë teatër politik.
Trump tha të hënën se ai dhe Xi kanë folur përmes përfaqësuesve dhe ai beson se dy udhëheqësit do shkojnë mirë në mandatin e tij të dytë.
Megjithatë, Trump ka emëruar shumë zyrtarë që njihen për qëndrimet e ashpra ndaj Kinës në postet kyçe në administratën e tij të ardhshme, duke përfshirë senatorin Marco Rubio si Sekretar Shteti, çka sinjalizon se politika e tij për Kinën mund të jetë më konfrontuese sesa gjatë mandatit të tij të parë.
Trump ka thënë gjithashtu se do vendosë një tarifë shtesë prej 10% për mallrat kineze nëse Pekini nuk bën më shumë për të ndaluar trafikimin e fentanilit në SHBA. Ai kërcënoi me tarifa mbi 60% për mallrat kineze gjatë fushatës.
Ministria e Jashtme e Kinës tha të martën se Pekini i kushtoi “rëndësi të madhe” vërejtjeve të Trump këtë javë dhe se është i gatshëm të punojë pë “zhvillim të qëndrueshëm, të shëndetshëm dhe të qëndrueshëm të ekonomisë dhe tregtisë kino-amerikane”.
