Avokati i TikTok-ut dhe kompanisë së tij mëmë kineze ByteDance ofroi një paralajmërim gjatë prezantimit të argumenteve të Gjykatës së Lartë mbi një ligj që do detyronte shitjen e aplikacionit të videove të shkurtra ose do e ndalonte atë në Shtetet e Bashkuar duke theksuar se “nëse Kongresi mund të bëjë këtë me TikTok, ai mund të bëjë të njëjtën gjë edhe me kompanitë e tjera”.
Ligji, i cili ishte objekt i argumenteve para nëntë gjyqtarëve, cakton si afat 19 janarin për ByteDance që të shesë platformën e njohur të mediave sociale ose të përballet me një ndalim për arsye sigurie kombëtare. Kompanitë kanë kërkuar, të paktën, një vonesë në zbatimin e ligjit, i cili sipas tyre shkel mbrojtjen e Amendamentit të Parë të Kushtetutës së SHBA-së kundër censurës së fjalës së lirë nga qeveria.
Noel Francisco, që përfaqëson TikTok-un dhe ByteDance, argumentoi se miratimi i këtij ligji nga Gjykata e Lartë mund të mundësojë statutet që synojnë kompani të tjera mbi baza të ngjashme.
Gjyqtarët sinjalizuan përmes pyetjeve të tyre gjatë argumenteve se ata ishin të prirur për të mbështetur ligjin, megjithëse disa shprehën shqetësime serioze për implikimet e Amendamentit të Parë. TikTok është një platformë e përdorur nga rreth 170 milionë njerëz në Shtetet e Bashkuara, afërsisht gjysma e popullsisë së vendit. Kongresi e miratoi masën vitin e kaluar me mbështetje dërrmuese dypartiake, pasi ligjvënësit përmendën rrezikun e shfrytëzimit të TikTok nga qeveria kineze për të spiunuar amerikanët dhe për të kryer operacione të fshehta të ndikimit.
Jeffrey Fisher, avokati që përfaqëson krijuesit e përmbajtjes së TikTok, të cilët gjithashtu kanë kundërshtuar ligjin, vuri në dukje gjatë argumenteve të Gjykatës së Lartë se Kongresi me këtë masë po përqendrohej te TikTok dhe jo te shitësit kryesorë kinezë në internet duke përfshirë Temu.
“A do linte jashtë një faqe të tregtisë elektronike si Temu që ka 70 milionë amerikanë që e përdorin atë, shqetësuar për këto rreziqe shumë dramatike?” e pyeti Fisher.
