Ka nisur procesi gjyqësor ndaj deputetit demokrat Gazment Bardhi, i cili është paditur nga ish-drejtori i Policisë së Shkodrës, Edmond Sulaj, për “Shpifje, kryer botërisht” dhe “Fyerje, kryer botërisht”. Kallëzimi i Sulajt erdhi pas një deklarate të Bardhit në Kuvend, ku ai akuzoi publikisht Sulajn se ishte emëruar drejtor policie në Shkodër nga bandat e strukturuara kriminale.
Në seancën e zhvilluar, Edmond Sulaj ka qenë i pranishëm, ndërkohë që Gazment Bardhi ka munguar. Ai përfaqësohet nga dy avokatët, Marash Logu dhe Ledio Braho.
Mbrojtja e ish-drejtorit të Policisë Shkodër, Edmond Sulaj, theksoi se deklarata e Bardhit, e bërë më 12 shtator 2024 gjatë një interpelance në Kuvend, ishte shpifëse dhe ka përhapur një akuzë të pavërtetë.
Sipas mbrojtjes, Bardhi ka përmendur disa materiale të SPAK-ut dhe ka bërë një akuzë të rënda ndaj Sulajt, duke e lidhur me grupet e strukturuara kriminale dhe duke e akuzuar për lidhje me to.
Mbrojtja e Sulajt deklaroi se ky fjalim është përhapur masivisht në media dhe ka dëmtuar rëndë reputacionin e tij, duke theksuar se akuzat janë të pabazuara dhe të pavërteta.
Seanca e radhës do të vijojë për të shqyrtuar provat dhe argumentet e palëve të përfshira në këtë proces gjyqësor.
“I akuzuari ka mohuar se njeh personalisht Edmond Sulën dhe në deklaratë duket se ai ka mbajtur një fjalim për kundërshtarët e tij.
Ky material, apo fakt i përhapur nga Bardhi, ka shkaktuar dëme ndaj z. Sula. Edmond Sula ka një karrierë prej 28 vitesh, ku ka mbajtur funksione të ndryshme.
Deklarata e bërë nga Gazmend Bardhi ka njollosur rëndë karrierën e Sulës. Dy vajzat e Sulës, pas deklaratës së Bardhit, kanë pësuar ofendime të shumta në rrjetet sociale dhe në ambientet ku punojnë dhe studiojnë. Bisedat i përkasin periudhës 2019-2020, tre vite përpara se të emërohej në detyrë Edmond Sula.
Në këto kushte, kërkojmë që Bardhi të dënohet për këtë vepër.”
I pranishëm në seancë, Sulaj tha se shumë shpejt do të dalë e vërteta se kush është ‘Mondi’ për të cilin flitet në ato komunikime.
“Duke qenë se çështja për të cilën i është referuar Gazmend Bardhi, dua të saktësoj që unë jam pyetur në cilësinë e dëshmitarit në lidhje me këto fakte dhe shumë shpejt do të dalë e vërteta se kush është ‘Mondi’ për të cilin flitet në ato komunikime.
Unë e kam deklaruar edhe në seancën e parë që jam emëruar me urdhër të Drejtorit të Përgjithshëm dhe jo me urdhër ministri. Jam krenar për atë që kam bërë me stafin që punon atje. Del qartë se çfarë është arritur për 1 vit e 1 muaj që unë kam qëndruar në Shkodër.”
Bardhi nuk ishte i pranishëm në seancë, por avokati i tij Marash Logu duket se u tërhoq nga akuzat, duke thënë se Bardhi nuk ka deklaruar se Sula ka marrëdhënie apo njohje personale me personat nën hetim, por ka theksuar se krimi i organizuar është i lidhur me Policinë e Shtetit.
“Në dosjen Metamorfoza, gjatë një komunikimi mes Pëllumb Gjokës dhe Ardit Hasanbegajt, diskutohet për emrin e Ministrit të Brendshëm, Taulant Balla.
Ky dhe Bledar Çuçi përfliteshin si pasues të Sandër Lleshajt. ‘Mua Mondi më duhet një dimër aty, vëlla,’ flitet mes këtyre dy personave.
Në kuadër të këtij procesi, kemi sjellë edhe një provë që vjen nga mediat e shkruara, sa i përket komunikimeve në Sky, etj. Pas dorëheqjes së Sandër Lleshajt, u emërua Bledar Çuçi.
Më pas, mori detyrën Taulant Balla. Në 15 korrik 2023, emërimi i Taulant Ballës u pasua me emërimin e Edmond Sulës. Përputheshin të dhënat dhe mbi këtë bazë ngrihen dyshime se kishte ndikim nga biznesmeni Pëllumb Gjoka, mik i ministrit Taulant Balla, dhe nga Ardit Hasanbegaj.
Është e qartë që nuk kemi të bëjmë me një përpjekje të Gazmend Bardhit për dezinformim. Ashtu si z. Bardhi, edhe deputetët e tjerë kanë detyrën të ngrenë zërin mbi shqetësimet apo denoncimet që u vijnë.
Bardhi nuk ka deklaruar se Sula ka marrëdhënie apo njohje personale me personat nën hetim, por ka theksuar se krimi i organizuar është i lidhur me Policinë e Shtetit.”
