Ministria e Mbrojtjes ka raportuar për përmirësimin e situatës nga moti i keq në Shqipëri, duke njoftuar se akset kombëtare janë të kalueshme.
Sipas raportimeve, janë ende problematika në disa zona, si Dibër, Bulqizë, Klos, Mat, Krujë, Fushë-Arrëz dhe Pogradec, ku disa rrugë rurale janë të bllokuara. Po punohet për hapjen e rrugëve dhe lidhjen e fshatrave të izoluara.
Në Dibër dhe Bulqizë, ka probleme me rrugët rurale, ndërsa në Klos dhe Mat, disa fshatra mbeten të bllokuar. Në Krujë dhe Fushë-Arrëz, vijon puna për hapjen e rrugëve të bllokuara nga bora. Po ashtu, në Pogradec dhe Has, po punohet për të normalizuar situatën e rrugëve lidhëse.
Ministria theksoi se Forcat e Armatosura janë angazhuar për të ndihmuar në situatat emergjente, ndërsa parashikimet e motit tregojnë se nuk priten reshje të shiut apo borës në ditët në vijim, por temperaturat do të vazhdojnë të ulen, duke arritur deri në -11 gradë Celsius në veri të vendit.
“Situata nga moti në vend.
Bazuar në informacionet e dërguara në Agjencinë Kombëtare të Mbrojtjes Civile nga strukturat e sistemit të Mbrojtjes Civile në nivel qendror dhe vendor, situata deri në orët e para të ditës paraqitet relativisht e qetë, krahasuar me ditët që lamë pas.
Nga raportimet e Autoritetit Rrugor Shqiptar, ditën e sotme të gjitha akset kombëtare janë të kalueshme.
Në bashkinë Dibër ka problematika në rrugët rurale në disa fshatra të njësive Maqellare, Melan, Luzni, Muhurr. Po punohet për hapjen e rrugëve që lidhin njësinë administrative Kala e Dodës me fshatrat Sllovë, Selishtë dhe Arras.
Në bashkinë Bulqizë: Janë të bllokuara rrugët rurale të njësive administrative Ostren, Trebisht, Klenjë, Gjoricë, Zerqan dhe aksi rrugor Trebisht-pikë kalimi kufitar.
Në bashkinë Klos: janë të bllokuar rrugët e fshatrave me qendrat administrative Gurë dhe Xibër.
Në bashkinë Mat janë të bllokuara 2 fshatra në njësinë administrative Komsi dhe aksi rrugor Vig Macukull.
Në bashkinë Krujë po vijon puna për hapjen e rrugës që lidh fshatin Shkretë me aksin Cudhi-Qafështamë.
Në bashkinë Fushë-Arrëz vazhdon të jetë e bllokuar rruga me njësinë administrative Iballë me fshatrat e saj. Në Bashkinë Devoll vijon puna për hapjen e rrugëve lidhëse me fshatrat Miras.
Në bashkinë Pogradec po punohet për hapjen e rrugëve të fshatrave Proptisht, Velçan, Trebinjë, Dardhas dhe Çërravë.
Në bashkinë Has po punohet për hapjen e rrugës që lidh njësinë administrative Arrën me rrugën nacionale dhe rrugët e fshatrave Cahan dhe Xhebexhi.
Vijojnë angazhimin për normalizimin e situatës në Vlorë, prej tashmë tre ditësh Forcat e Armatosura me 7 pompa thithëse dhe 15 mjete të kalueshmërisë së lartë, ekskavatorë, kamionë vetëshkarkues etj.
Sipas parashikimit të motit në ditët në vazhdim nuk do ketë prezencë të reshjeve të shiut apo të borës në të gjithë vendin. Temperaturat do vijojnë të ulen, ku në veri të vendit do të shkojë në -11 gradë celsius.
Janë në gatishmëri të plotë të gjitha kapacitetet në nivel qendror dhe vendor të sistemit të mbrojtjes civile për përballimin e çdo situate që mund të shkaktohet nga kushtet e motit”, thuhet në njoftim.
