Kabineti i sigurisë i Izraelit ka miratuar të premten marrëveshjen për armëpushim në Gaza dhe lirimin e pengjeve, sipas CNN.
Pas kësaj, pritet që më vonë gjatë ditës të mblidhet edhe kabineti i gjerë për të votuar mbi këtë marrëveshje.
Zyra e Kryeministrit izraelit konfirmoi më herët se është arritur një marrëveshje me Hamasin për lirimin e pengjeve të mbajtura në Gaza.
Sipas zyrtarëve amerikanë, kjo marrëveshje, që pritet të hyjë në fuqi të dielën, do të përfshijë një ndalim të përkohshëm të luftimeve në Gaza dhe një proces gradual të lirimit të pengjeve dhe të burgosurve palestinezë.
Ndërkohë, bombardimet izraelite kanë shkaktuar dhjetëra viktima në Gaza që nga shpallja e marrëveshjes, duke shënuar numrin më të lartë të vdekjeve ditore për më shumë se një javë.
Agjencitë ndërkombëtare të ndihmës kanë mirëpritur marrëveshjen dhe kanë shprehur angazhimin për të rritur përpjekjet e tyre në Gaza.
Agjencia e OKB-së për refugjatët palestinezë ka bërë thirrje për “akses të shpejtë, të papenguar dhe të vazhdueshëm humanitar” në rajon për të lehtësuar vuajtjet e shkaktuara nga lufta.
