Ndërsa gjyqtarët e Gjykatës së Lartë po shqyrtojnë të ardhmen e TikTok-ut në Shtetet e Bashkuara, një numër gjithnjë e më i madh përdoruesish të mediave sociale amerikane po reagojnë duke kaluar në një alternativë të pazakontë: Xiaohongshu, një aplikacion shumë popullor social në Kinë.
Aplikacioni, i cili do të thotë “Little RedNote,” shpesh i shkurtuar nga përdoruesit amerikanë në RedNote, shpërtheu në pozitat e para në Apple US App Store të martën.
I themeluar në vitin 2013, Xiaohongshu është një nga platformat më të mëdha të mediave sociale në Kinë me 300 milion përdorues, sipas firmës kërkimore Qian Gua. I përshkruar si përgjigja e Kinës ndaj Instagram-it, aplikacioni është bërë veçanërisht popullor për ndarjen e këshillave mbi udhëtimet, grimin dhe modën.
Por, ndërsa ka dominuar në tregun kinez, Xiaohongshu nuk ka arritur të bëhet shumë i njohur jashtë botës kinezishtfolëse. Deri tani.
Pse po bëhet kaq i njohur Xiaohongshu?
Xiaohongshu po rritet në popullaritet në mbarë botën në të njëjtën javë kur TikTok mund të dalë jashtë linje në SHBA.
Shkarkimet e aplikacionit Xiaohongshu në telefonat celularë në SHBA pothuajse u trefishuan gjatë javës së kaluar, krahasuar me shtatë ditët e mëparshme, i tha CNN të martën firma e inteligjencës së tregut Sensor Tower, me qendër në San Francisco.
Brenda dy ditëve, më shumë se 700,000 përdorues të rinj i janë bashkuar Xiaohongshu, raportoi Reuters, duke cituar një burim të afërt me kompaninë. CNN ka kontaktuar Xiaohongshu për një koment.
Që nga e mërkura, hashtag-u “TikTok refugjat” kishte mbledhur rreth 250 milionë shikime dhe mbi 5.5 milionë komente. Shumë nga përdoruesit amerikanë të cilët iu bashkuan, e bënë këtë si një akt sfide ndaj veprimeve të Uashingtonit kundër TikTok.
“Qeveria jonë është jashtë mendjes së tyre nëse ata mendojnë se ne do ta mbështesim këtë ndalim të TikTok”, tha një përdorues i quajtur Heather Roberts në një video-mesazh në Xiaohongshu, i cili ka mbledhur më shumë se 45,000 pëlqime. “Ne thjesht po shkojmë në një aplikacion të ri kinez dhe ja ku jemi.”
“Kjo është shumë më mirë se TikTok,” tha një tjetër refugjat në një mesazh video. “Amerikanët po vijnë këtu … kështu që më vjen keq që do të na urreni, por ju premtoj se do të bëjmë më të mirën.“
Si po ndërveprojnë përdoruesit kinezë dhe amerikanë në platformë?
Migrimi i papritur i përdoruesve amerikanë në Xiaohongshu ka krijuar një mundësi të veçantë për përdoruesit kinezë dhe amerikanë të ndërveprojnë mes tyre.
“Unë thjesht dua t’ju siguroj se ne duam të përpiqemi të gjejmë një mënyrë për të komunikuar me ju dhe të jemi të respektueshëm ndaj komunitetit tuaj,” tha një përdorues. “Ne duam të jemi mysafirë të mirë.”
Disa përdorues amerikanë kanë ftuar bashkatdhetarët e tyre që të respektojnë përdoruesit kinezë në platformë. “Një mesazh i shpejtë për përdoruesit amerikanë që vijnë këtu: Ju lutemi mos e sillni politikën këtu. Ne duam të argëtohemi, të kënaqemi dhe të tregojmë respekt për ata që janë tashmë këtu,” postoi një përdorues.
Shumica e përdoruesve kinezë i kanë mirëpritur ngrohtësisht të sapoardhurit dhe disa madje kanë ndarë video tutoriale për t’i ndihmuar “refugjatët e TikTok”-ut të rinj të mësojnë si të lundrojnë në aplikacion.
Shumica e përdoruesve kinezë i kanë mirëpritur ngrohtësisht të sapoardhurit, dhe disa prej tyre kanë ndarë madje video tutoriale për të ndihmuar “refugjatët e TikTok”-ut të rinj të lundrojnë në aplikacion.
“Ky mund të jetë një moment historik,” komentoi një përdorues kinez. “Ndihet sikur kaq shumë ka ndryshuar në një çast. Njerëz të zakonshëm nga dy vendet tona nuk janë lidhur kurrë më parë… Shpresoj që të gjithë të mund ta shfrytëzojnë këtë mundësi të shkurtër për të marrë pjesë në shkëmbime të kuptimshme idesh.”
Madje, një përdorues shfrytëzoi mundësinë e ofruar nga fluksi i përdoruesve të internetit amerikanë për të kërkuar ndihmë me detyrat e shtëpisë në anglisht, duke postuar një kërkesë virale që mblodhi mbi 2000 pëlqime.
Ivy Yang, një analist i teknologjisë kineze dhe themelues i firmës konsulente Wavelet Strategy, tha se përdoruesit amerikanë të rinj kishin “krijuar papritur një nga format më organike të shkëmbimit kulturor midis SHBA-së dhe Kinës që kemi parë vitet e fundit”.
“Përdoruesit po gjejnë mënyra krijuese për të kapërcyer barrierat gjuhësore, për të lundruar në dallimet kulturore dhe për të bashkëjetuar në mënyra magjepsëse,” shtoi ai. “Ky lloj ndërtimi të komunitetit që po ndodh në kohë reale mund të ketë ndikim të qëndrueshëm, dhe unë jam optimiste, por e kujdesshme.”
Një periudhë të shkurtër në vitin 2021, shkëmbime të ngjashme u panë edhe në aplikacionin e mediave sociale Clubhouse, ku përdoruesit kinezë dhe amerikanë u përfshinë në dialog të pacensuruar mbi tema të ndjeshme në dhomat e bisedave virtuale, përpara se censuruesit kinezë të ndërhynin për të bllokuar aplikacionin.
Që nga e marta, vetëm një “përqindje shumë e vogël” e postimeve në X rreth Xiaohongshu kanë prekur tema të ndjeshme në Kinë, ku diskursi në internet censurohet me kujdes, sipas firmës së inteligjencës mediatike PeakMetrics.
Si ndryshon Xiaohongshu nga TikTok?
E para, Xiaohongshu nuk është krijuar për anglishtfolësit, ndërsa TikTok nuk është i disponueshëm në Kinë. Emri i Xiaohongshu-t mund të shikohet si një referencë e hapur për një libër me citate të mbuluara me ngjyrë të kuqe, një simbol i Mao Ce Dunit, babait themelues të Kinës komuniste.
Një nga veçoritë kryesore të aplikacionit është algoritmi i tij i përmbajtjes, i cili fokusohet më shumë te interesat e përdoruesve sesa te njerëzit që ata ndjekin. Disa përdorues thonë se kjo nxit krijimin e përmbajtjes më origjinale dhe redukton ndikimin e personazheve të njohur dhe influencuesve të fuqishëm.
Kompania që qëndron pas Xiaohongshu, Xingin Information Technology, u themelua nga Charlwin Mao dhe Miranda Qu dhe ka selinë në Shangai.
Nga ana tjetër, TikTok është në pronësi të kompanisë kineze të internetit ByteDance dhe është krijuar për një audiencë globale. TikTok nuk është i aksesueshëm në Kinë, ku një aplikacion motër, Douyin, shërben për tregun vendas.
A po kalojne përdoruesit e TikTok-ut në SHBA në aplikacione të tjera përveç Xiaohongshu?
Lemon8, një aplikacion komuniteti për stilin e jetës, i zotëruar gjithashtu nga ByteDance, aktualisht renditet si aplikacioni i dytë më i shkarkuar në dyqanin e Apple në SHBA. Lemon8 ka një funksion të ngjashëm me TikTok për ndarjen e videove dhe është modeluar sipas Instagram dhe Pinterest. Aplikacioni u lançua për herë të parë në SHBA në 2023.
Megjithatë, është e paqartë nëse një ndalim i mundshëm i TikTok në SHBA mund të ndikohet dhe në operacionet e Lemon8. Ligji i miratuar nga Kongresi i SHBA-së vitin e kaluar thotë se ndalimi i aplikacioneve që janë në pronësi ose menaxhohen nga ByteDance mund të zbatohet për të gjitha këto platforma. Kjo do të thotë që, edhe pse Lemon8 nuk përmendet në mënyrë të drejtpërdrejtë në ligj, ndalimi mund të shtrihet edhe në këtë aplikacion.
VINI RE: Ky artikull është pronësi intelektuale e CNN
