Turqia ka arrestuar nëntë persona, përfshirë pronarin e hotelit, në lidhje me një zjarr vdekjeprurës që u mori jetën e 76 personave dhe plagosi dhjetëra të tjerë në një vendpushim skish në Turqinë perëndimore, tha ministri i Brendshëm Ali Yerlikaya.
Yerlikaya raportoi gjithashtu se trupat e 45 viktimave u ishin dorëzuar familjeve të tyre, ndërsa testet e ADN-së po kryheshin për të identifikuar trupat e mbetur.
Zjarri ra në hotelin “Grand Kartal” në vendpushimin e skive Kartalkaya në malet Bolu.
Hoteli ku shpërtheu zjarri shprehu dhimbjen e thellë në një deklaratë të mërkurën dhe u zotua për bashkëpunim të plotë me hetimin.
“Ne po bashkëpunojmë me autoritetet për të hedhur dritë mbi të gjitha aspektet e këtij incidenti”, thuhet në deklaratë.
Hoteli 12-katësh, i cili kishte 238 turistë, u përfshi nga flakët pasi zjarri nisi në katin e restorantit rreth orës 3:30 të mëngjesit. Të mbijetuarit përshkruan skena paniku teksa iknin nëpër korridoret e mbushura me tym dhe u hodhën nga dritaret për të shpëtuar.
Autoritetet po përballen me kritika në rritje për masat e sigurisë së hotelit, pasi të mbijetuarit raportuan se asnjë alarm zjarri nuk u ndez gjatë incidentit. Të ftuarit thanë se duhej të lëviznin nëpër korridoret e mbushura me tym në errësirë të plotë.
Presidenti Erdogan shpalli të mërkurën ditë zie kombëtare pas tragjedisë, e cila ndodhi gjatë pikut të sezonit të turizmit dimëror, me shumë familje nga Stambolli dhe Ankaraja që udhëtojnë drejt maleve Bolu për ski.
