David Lebryk, zyrtari më i lartë i karrierës në Departamentin e Thesarit të SHBA-së, pritet të largohet nga posti pas një përplasjeje me aleatët e miliarderit dhe këshilltarit të Donald Trump, Elon Musk, mbi aksesin në një sistem të ndjeshëm pagesash, raportoi të premten “Washington Post”.
Sipas raportit, i cili citon tre burime të njohura me çështjen, Lebryk dhe përfaqësues të Musk u konfliktuan për aksesin në një sistem që administron mbi 6 trilionë dollarë pagesa vjetore, përfshirë përfitimet e Sigurimeve Shoqërore dhe Medicare, pagat federale, pagesat e kontratave qeveritare dhe rimbursimet e taksave.
Ende mbetet e paqartë se përse ekipi i lidhur me Musk të cilin presidenti Trump e ka ngarkuar me reformimin e qeverisë kërkoi akses në këtë sistem.
As përfaqësuesit e Departamentit të Thesarit dhe as vetë Lebryk nuk kanë dhënë komente mbi raportin. Nuk dihet ende data e largimit të tij, por sipas *Washington Post*, kjo do të ndodhë së shpejti.
Ndërkohë, të hënën, Senati i SHBA-së konfirmoi Scott Bessent si Sekretar të Thesarit në administratën Trump.
Musk, i cili ka fituar ndikim të madh në administratën Trump, ka vendosur bashkëpunëtorë të tij në disa agjenci federale dhe ka kërkuar të ushtrojë më shumë kontroll mbi operacionet qeveritare. Një urdhër ekzekutiv i nënshkruar nga Trump i jep DOGE akses në të gjitha të dhënat dhe sistemet jo të klasifikuara të agjencive federale, duke përfshirë sistemin e pagesave të Thesarit.
Ekspertët kanë ngritur shqetësime mbi implikimet e kësaj lëvizjeje, duke theksuar se sistemi i pagesave qeveritare nuk është përdorur kurrë për agjenda politike. Lebryk, i cili kishte një reputacion të shkëlqyer mes kolegëve të tij, u largua duke lavdëruar punën e stafit të Thesarit në një email lamtumire.
