Arabia Saudite tha se nuk do vendoste lidhje me Izraelin pa krijimin e një shteti palestinez, duke kundërshtuar pretendimin e Presidentit amerikan Trump për zhvendosjen e palestinezëve nga Gaza, shkruan Reuters.
Në një njoftim tronditës, Trump tha të martën se Shtetet e Bashkuara do marrin përsipër enklavën e shkatërruar nga lufta pasi palestinezët të zhvendosen diku tjetër dhe ta zhvillojnë atë ekonomikisht. Ai po fliste në një konferencë të përbashkët shtypi me kryeministrin izraelit Benjamin Netanyahu gjatë një vizite të këtij të fundit në Uashington.
Arabia Saudite kundërshton çdo përpjekje për të zhvendosur palestinezët nga toka e tyre, tha Ministria e Jashtme saudite në një deklaratë të mërkurën, duke shtuar se qëndrimi i saj ndaj palestinezëve nuk është i negociueshëm.
Princi i kurorës Mohammed bin Salman ka pohuar pozicionin e mbretërisë në “mënyrë të qartë dhe eksplicite” që nuk lejon asnjë interpretim në asnjë rrethanë, thuhet në deklaratë.
Çdo zhvendosje e propozuar e palestinezëve është një çështje shumë e ndjeshme si për palestinezët ashtu edhe për vendet arabe.
Ndërsa luftimet u ndezën në luftën e Gazës, palestinezët kishin frikë se do vuanin një tjetër “Nakba”, ose katastrofë, koha kur qindra mijëra u shpronësuan nga shtëpitë e tyre gjatë themelimit të shtetit të Izraelit.
Shtetet e Bashkuara kishin udhëhequr muaj të tërë diplomacie për të detyruar Arabinë Saudite, një nga shtetet arabe më të fuqishme dhe me ndikim, të normalizonte lidhjet me Izraelin dhe të njihte vendin. Por lufta e Gazës, që filloi në tetor 2023, bëri që Riadi ta lërë këtë çështje përballë zemërimit arab ndaj ofensivës së Izraelit.
Trump do donte që Arabia Saudite të ndiqte gjurmët e vendeve si Emiratet e Bashkuara Arabe, një qendër tregtare dhe biznesi në Lindjen e Mesme, dhe Bahreini që nënshkruan të ashtuquajturat Marrëveshje të Abrahamit në 2020 dhe normalizuan lidhjet me Izraelin.
Duke vepruar kështu, ata u bënë shtetet e para arabe në një çerek shekulli që thyen një tabu të kahershme.
Vendosja e lidhjeve me Arabinë Saudite do ishte çmimi më i rëndësishëm për Izraelin, sepse mbretëria ka ndikim të madh në Lindjen e Mesme, në botën më të gjerë myslimane dhe është eksportuesi më i madh i naftës në botë.
