Feyenoordi e nisi në mënyrë perfekte fazën e eliminimit direkt në Ligën e Kampionëve duke mposhtur AC Milanin 1-0 në ndeshjen e parë të play-off-it, në atë që ishte paraqitja e parë e klubit holandez në këtë fazë të garës që nga sezoni 1984/85.
Ndërkohë, Rossonerët mbeten pa fitore në 12 ndeshjet e tyre të fundit si mysafirë në fazën me eliminim direkt të UCL.
Të gjitha sytë ishin te sulmuesi Santiago Giménez, i cili ishte golashënuesi më i mirë i Feyenoordit në fazën e grupeve, përpara se të transferohej në Milan gjatë janarit.
Megjithatë, rikthimi i tij në “De Kuip” u kthye shpejt në një makth. Vetëm në minutën e katërt, Igor Paixão u shkëput nga krahu i majtë dhe lëshoi një goditje nga cepi i zonës, e cila i kaloi përmes duarve portierit Mike Maignan dhe përfundoi në rrjetë.
Terreni i lagësht nuk ndihmoi portierin francez, por në anën tjetër, Timon Wellenreuther nuk pati probleme të ndalte përpjekjet e Tijjani Reijnders dhe João Félix, të dyja pas golit të hershëm të vendasve.
Tensionet u rritën rreth minutës së 30-të, kur fillimisht Paixão dhe më pas Rafael Leão u rrëzuan në zonat kundërshtare, por arbitri José Sánchez nuk akordoi penallti në asnjërin rast. Kjo situatë e motivoi edhe më shumë Paixãon, i cili provoi një goditje të harkuar nga 25 metra në minutën e 37-të, por topi preku traversën.
Feyenoordi mund të jetë duke vuajtur në Eredivisie, por forma e tyre e mirë në Champions League vazhdoi edhe në pjesën e dytë, ku ata nisën më mirë.
Thomas Beelen detyroi Maignan të ndërhynte pas një goditjeje nga këndi, ndërsa zëvendësuesi Julián Carranza pati një rast të mirë, por goditja e tij përfundoi jashtë pas një aksioni tjetër të shkëlqyer nga Paixão.
Skuadra e Sérgio Conceição gjeti ritmin në 20 minutat e fundit të ndeshjes, por nuk arriti të barazonte rezultatin. Reijnders provoi një gjuajtje spektakolare nga distanca, por topi kaloi mbi traun e portës.
Ndërkohë, Samuel Chukwueze, Strahinja Pavlović dhe Félix nuk mundën të mposhtnin Wellenreutherin, i cili bëri disa pritje vendimtare.
Në fund, Feyenoordi arriti fitoren e shtatë në 12 ndeshjet e fundit kundër skuadrave italiane, ndërsa Milani vazhdon të vuajë ndaj ekipeve holandeze, duke mbetur pa fitore në pesë ndeshjet e fundit kundër tyre.
Të dy ekipet do të përballen sërish të martën e ardhshme në “San Siro”, ku fituesi do të përballet me Arsenalin ose Interin në fazën tjetër.
