Një numër rekord gazetarësh u vranë në mbarë botën vitin e kaluar, tha të mërkurën Komiteti për Mbrojtjen e Gazetarëve. Të paktën 124 gazetarë në 18 vende vdiqën në vitin 2024, viti më vdekjeprurës për gazetarët dhe punonjësit e medias që kur komiteti filloi regjistrimin e numrave më shumë se tre dhjetëvjeçarë më parë, tha CPJ në një deklaratë.
CPJ tha se lufta Izrael-Gaza ka shkaktuar vdekjen e 85 gazetarëve në duart e ushtrisë izraelite dhe akuzoi Izraelin për përpjekjen për të mbytur hetimet e incidenteve e për të hedhur fajin mbi gazetarët, shkruan Reuters.
Ushtria izraelite, kur u pyet për koment, tha se nuk ishte dhënë informacion i mjaftueshëm për incidentet e supozuara dhe se për këtë arsye nuk ishte në gjendje t’i kontrollonte ato, duke shtuar se ajo merr të gjitha masat e mundshme operacionale për të zbutur dëmtimin e gazetarëve dhe civilëve.
“IDF kurrë nuk ka shënjestruar dhe kurrë nuk do synojë qëllimisht gazetarët”, thuhet në deklaratë.
Numri i gazetarëve dhe punonjësve të medias të vrarë në 2024 është rritur ndjeshëm gjatë viteve të fundit – 102 u vranë në 2023 dhe 69 u vranë në 2022, sipas CPJ. Rekordi i mëparshëm i vdekjeve ishte në vitin 2007, kur 113 gazetarë humbën jetën, pothuajse gjysma për shkak të Luftës në Irak, tha komiteti.
Sudani dhe Pakistani kishin numrin e dytë më të lartë të gazetarëve të vrarë vitin e kaluar, tha komiteti.
“Sot është koha më e rrezikshme për të qenë gazetar në historinë e CPJ-së”, tha në deklaratë CEO Jodie Ginsberg.
CPJ tha se kishte dokumentuar një “rritje alarmante në numrin e vrasjeve në shënjestër”, duke shtuar se të paktën 24 gazetarë u vranë qëllimisht për shkak të punës së tyre vitin e kaluar, duke përfshirë në Haiti, Meksikë, Myanmar, Sudan dhe gjetkë. Ai tha se kishte dokumentuar të paktën 10 raste të vrasjeve të synuara nga Izraeli.
