Në një intervistë radiofonike për Fox News, presidenti amerikan Donald Trump deklaroi se homologu i tij ukrainas, Volodymyr Zelenskyy, nuk ka forcën e duhur për të ndikuar në përfundimin e luftës në Ukrainë.
Gjatë intervistës, Trump vijoi kritikat ndaj Ukrainës, duke e cilësuar vizitën e fundit të Sekretarit amerikan të Thesarit në Kiev si të panevojshme. “Sinqerisht, do të doja që ai të mos kishte shkuar atje, ishte një humbje kohe,” tha ai.
Trump gjithashtu minimizoi rolin e Zelenskyy-t në negociatat për armëpushim, duke pretenduar se prania e tij nuk është e rëndësishme. “Nuk mendoj se ai është një faktor kyç në këto takime,” u shpreh ai, duke shtuar se tre vitet e tij në pushtet e kanë bërë më të vështirë arritjen e marrëveshjeve.
Gjatë intervistës, Trump përmendi edhe presidentin francez Emmanuel Macron dhe kryeministrin britanik Keir Starmer, duke kritikuar rolin e tyre në përpjekjet për t’i dhënë fund konfliktit në Ukrainë, pak para vizitave të tyre të planifikuara në Shtëpinë e Bardhë javën e ardhshme.
