Një person vdiq dhe dy oficerë policie u plagosën rëndë të shtunën në një sulm me thikë në Francën lindore që presidenti Emmanuel Macron tha se ishte një “akt terrorist islamik”.
Prokurorët thanë se tre oficerë të tjerë u plagosën lehtë në sulmin në qytetin Mulhouse, të kryer nga një i dyshuar 37-vjeçar i cili është në një listë vëzhgimi për parandalimin e terrorit, të quajtur FSPRT, tha prokurori Nicolas Heitz për AFP, përcjell France 24.
I dyshuari është arrestuar.
Njësia kombëtare e prokurorëve kundër terrorizmit të Francës (PNAT), e cila ka marrë përsipër hetimin, tha se i dyshuari sulmoi fillimisht oficerët e policisë bashkiake, duke thirrur “Allahu Akbar” (Zoti është më i madhi).
Dëshmitarët konfirmuan për AFP se i dyshuari kishte bërtitur disa herë fjalët që përdoren nga muslimanët si një thirrje për besimin e tyre.
Një kalimtar civil që ndërhyri u plagos për vdekje, tha PNAT në një deklaratë.
Sipas prokurorëve të Mulhouse, ai ishte një shtetas portugez 69-vjeçar.
Macron tha se nuk kishte “asnjë dyshim” se incidenti ishte “një akt terrorist”, veçanërisht “një akt terrorist islamik”.
Qeveria ishte e vendosur të vazhdonte të bënte “gjithçka për të çrrënjosur terrorizmin në tokën tonë”, shtoi Macron.
Lista vëzhguese e FSPRT-së përmbledh të dhëna nga autoritete të ndryshme për individë me qëllim parandalimin e radikalizimit “terrorist”. Ai u lançua në vitin 2015 pas sulmeve vdekjeprurëse në zyrat e revistës satirike Charlie Hebdo dhe në një supermarket hebre.
Një nga policët e plagosur rëndë pësoi një lëndim në arterien karotide dhe tjetri në kraharor, tha Heitz.
