Kryebashkiaku i Tiranës Veliaj ka reaguar sërish ditën e sotme.
Ai shkruan se reagimi ka ardhur pas komentit të një dashamirësi i cili e ka këshilluar të mos merret me prokurorin e çështjes së tij Olsi Dado po me të vërtetat, në mënyrë që të mos bëhet si Berisha.
Veliaj, i cili ndodhet në paraburgimin e Durrësit, shkruan se nuk ka dashur kurrë që çështja të mbërrijë deri këtu për të demaskuar atë që e quan “pis që godet për llogari të Sali Berishës”.
Ai thekson se nuk e ka me SPAK-un qëndrimin që mban po me prokurorin, të cilin e cilëson një “klloun e pervers” që ka vepruar për llogari të Berishës.
Në fund kryebashkiaku i Tiranës shkruan se ndryshe nga Berisha që sulmon SPAK-un, e keqja e tij dhe e vetë SPAK-ut është prokurori Dado ndërsa nuk lë pa përmendur edhe gjyqtarin e Gjykatës së Posaçme, të cilin e quan një produkt të njohur të kënetës që është gjithnjë gati për të goditur një socialist.
Komenti i Veliajt
“Dëgjova për komentin e një dashamirësi, që më inkurajonte të çmontoja akuzën perverse të Ols Dados, por më kritikonte pse merresha me të personalisht!
E mirëkuptoj, dhe madje mendoj se me siguri ka të drejtë kur thotë kapu tek e vërteta jote, e mos u bëj si Saliu që sulmon Dumanin dhe prokurorët e SPAK-ut! Por, më duhet ta pranoj se, megjithëse s’do doja kurrë të arrinin punët deri këtu dhe të më duhej të demaskoja një pis që godet për llogari të Sali fundërrinës, e kam të pamundur ta pranoj se SPAK-u mund të ketë surratin e Ols Angonit!
Prandaj, të ma falin ata që e konsiderojnë gabim reagimin tim ndaj këtij dështaku të rrezikshëm.
Por, ndërkohë i siguroj se ndryshe nga Saliu i Nesti Dados, unë nuk e kam me SPAK-un, po me abuzimin e një kllouni me të gjithë përpjekjen popullore për drejtësi.
Ndryshe nga Saliu, unë nuk dua dhe as luftoj për të shkrirë SPAK-un, por dua dhe do të luftoj deri në fund me një pervers që, për llogari të Saliut, më mbyll mua në burg pa gjyq m’u para zgjedhjeve, ndërkohë që Saliu livadhis e kërkon vota për të shkrirë SPAK-un.
Ndryshe nga Saliu, të cilit as i është kontrolluar banesa, as i janë marrë telefonat familjarisht, as i janë vënë në kurriz “prona të fshehura” në emër të vajzës a djalit, mua më kanë ndodhur të tëra këto e më keq se kaq, por unë nuk e kam asgjëkundi me reformen në drejtësi, me SPAK-un apo me kolegë të Ols Angonit, që meritojnë mbështetje dhe respekt.
Tani ç’të them, e keqja ka emër dhe nëse për Saliun mbretin e kënetës, e keqja quhet SPAK, për mua e keqja e ime dhe e SPAK-ut vetë quhet Ols Dado, një “vrasës me pagesë”, që aspak çuditërisht këmbët prej gjarpëri i ka në kënetën e Saliut.
Për të mos e harruar fare, pjesë e së keqes është edhe Erion Bani, një tjetër produkt i mirënjohur i kënetës, që gjendet gjithnjë gati kur duhet të goditet një armik socialist.”
