Kreu i Kinës Xi Jinping tha se vendi i tij dhe Rusia ishin “miq të vërtetë që kanë kaluar shumë së bashku” pas një videotelefonate me presidentin Putin të hënën, pjesë e një afirmimi të ndërsjellë të besnikërisë midis Pekinit dhe Moskës ndërsa presidenti amerkan Trump po negocion me të fundin e luftës në Ukrainë.
Fjalët e ngrohta që i atribuohen Xi Jinping në mediat shtetërore kineze synonin qartësisht të shuanin spekulimet se administrata Trump, e cila ka ndjekur një afrim të shpejtë me Rusinë, mund të ketë sukses në vendosjen e një pyke mes Pekinit dhe Moskës.
Thirrja erdhi në përvjetorin e pushtimit të Ukrainës nga Rusia në vitin 2022, pas tre vitesh në të cilat Kina i zgjati një litar shpëtimi Rusisë duke e ndihmuar Putinin të përballojë izolimin ekonomik nga Perëndimi dhe luftën në fushën e betejës.
Pak para pushtimit të Ukrainës, Xi dhe Putin paralajmëruan një partneritet “pa kufij”. Që atëherë, Kina ka mbështetur makinerinë luftarake të Rusisë me blerjet e naftës dhe eksportet e teknologjive me përdorim të dyfishtë.
Xi dhe Putin ndajnë gjithashtu të njëjtën qasj ideologjike ndaj Perëndimit. Ata kritikojnë Shtetet e Bashkuara për frenimin e ambicieve të tyre globale dhe promovojnë një riformësim të rendit global për të dobësuar mbizotërimin e Uashingtonit.
“Historia dhe e tashmja na tregojnë se Kina dhe Rusia janë fqinjë të mirë që nuk do largohen dhe miq të vërtetë që kanë kaluar shumë së bashku, mbështesin njëri-tjetrin dhe zhvillohen së bashku”, citohet të ketë thënë Xi nga media shtetërore kineze.
Xi tha se marrëdhëniet midis Kinës dhe Rusisë nuk “ndikoheshin nga asnjë palë e tretë”, në atë që dukej të ishte një referencë e zhdrejtë për Shtetet e Bashkuara. Dhe ai tha se politikat e jashtme të dy vendeve ishin atje për “një afat të gjatë”.
Kremlini lëshoi një deklaratë të ngjashme të përzemërt pas telefonatës, duke e përshkruar bisedën e Xi dhe Putin si “të ngrohtë dhe miqësore”. Në kundërshtim të idesë se presidenti Trump mund të ndante të dy vendet, Kremlini shtoi: “Udhëheqësit theksuan se lidhja e politikës së jashtme ruso-kineze është faktori më i rëndësishëm stabilizues në çështjet botërore” dhe thanë se marrëdhënia “nuk ishte subjekt i ndikimit të jashtëm”.
Telefonata ishte e dyta mes Xi dhe Putinit në pak më shumë se një muaj, që erdhi më pak se dy javë pasi Trump ndryshoi strategjinë e SHBA-së ndaj Rusisë duke telefonuar Putinin dhe duke u shfaqur në anën e tij për luftën në Ukrainë, shkruan NY Times.
