Palët në bisedime për të formuar qeverinë e re të Gjermanisë po konsiderojnë ngritjen e shpejtë të dy fondeve speciale me vlerë qindra miliarda euro, një për mbrojtjen dhe një të dytë për infrastrukturën, thanë për Reuters tre persona me njohuri për këtë çështje.
Ekonomistët që këshillojnë partitë që ka të ngjarë të formojnë një koalicion të ri qeveritar vlerësojnë rreth 400 miliardë euro për fondin e mbrojtjes dhe 400 miliardë deri në 500 miliardë euro për fondin e infrastrukturës, thanë njerëzit.
Takimi i nxehtë i së premtes në Shtëpinë e Bardhë midis presidentit ukrainas Zelensky dhe presidentit amerikan Trump rriti ndjenjën e urgjencës në Berlin për të vepruar më shpejt në shpenzimet për mbrojtjen e vetë Gjermanisë dhe për Ukrainën, thanë ata.
Figura të larta nga konservatorët gjermanë dhe socialdemokratët filluan bisedimet të premten për formimin e një qeverie koalicioni me shpresën se Friedrich Merz, kreu i bllokut konservator që doli i pari në zgjedhjet e javës së kaluar, do formonte një qeveri deri në Pashkë.
Dy fondet speciale po diskutohen nga tre parti – Kristian Demokratët (CDU), Bashkimi Kristian Social bavarez (CSU) dhe Social Demokratët (SPD) e kancelarit Olaf Scholz. Asnjë vendim përfundimtar nuk është marrë ende, shtuan ata. Palët nuk pranuan të komentojnë, duke përmendur konfidencialitetin e bisedimeve.
